پنجگور : صابر نور عابد نور ءِ زورانسری ءِ ھلاپ ءَ روانک ءُ نندانک داتگ

سی ستمبر ءَ بلوچستان ءِ دمگ پنجگور ءَ زورانسری آوار جنگ بیتگیں دوئیں برات صابر نور ءُ عابد نور ءِ یل نہ کنگ ءِ ھلاپ ءَ کھول نیمگ ءَ چہ روانک ءُ ڈپٹی کمشنر کارگس دیم ءَ نندانک داتگ-

زھرشانی روانک ءَ زالبول ءُ زھگاں ھوار مزنیں کچے ءَ مردماں بھر زرتگ زورانسری آوار جنی ءِ ھلاپ ءَ تُرندیں ناراہ جتگ ءُ دوئیں براتانی یل کنائینگ ءِ لوٹ کتگ-

کھول گوشگ اِنت کہ مروچی شانزدہ روچ بیتگ کہ صابر نور ءَ عابد نور بید جرم ءَ ریاستی آزارجاھاں زوراکی اوپار کنگ ءَ اَنت-

آئی ءَ گوشتگ کہ گوستگیں شانزدہ روچاں ریاست عابد ءُ صابر ءِ کھول ءَ گوں یکو دروگ پُشت ءَ دروگ بندگ ءَ اِنت، پیسر ءَ گوشتگ اِنت کہ بیست چار کلاکانی تہ ءَ دوئیں براتاں یل کن ایں، اشی ءَ پد ھرچ دومی روچ ءَ کول کتگ بلے انگت دوئیں برات بیگواہ ءَ اَنت-

آئی ءَ گوشتگ کہ مروچی کھول لاچار بیتگ ڈی سی کارگس دیم ءَ نندانگ دیگ ءَ اِنت، پنجگور ءِ راج ءَ گوں دزبندی اِنت کہ نندانک ءَ بھر بزور اَنت عابد ءُ صابر ءَ ھوار دگہ سرجمیں بیگواھیں مردمانی یل کنائینگ ھاتر ءَ توار چست بہ کن اَنت-

زانگ بہ بیت کہ سی یک ستمبر ءِ سھب ءَ پاکستانی پوج ءَ پنجگور ءِ دمگ تار کارگس ءَ بیڑبرتگ دو برات صابر نور ءُ عابد نور ءِ زورانسری آوار جنی ءَ پد ناشناسیں جاھے ءَ برتگ اَنت چریشی ءَ پد دوئیں برات بیگواہ اَنت-

کھول نیمگ ءَ چہ دوئیں براتانی زورانسری آوار جنی ءِ ھلاپ ءَ اشی ءَ ساری نندانک داتگ سی پیک دگ پہ گاڑیانی واستا روگ آیگی ءَ بند کتگ-

اشی ءَ پد زھرشانی کنوک ءُ وکدار میان ءَ گپ دیوان ءَ پد نندانک مھتل بیتگ، واکداراں گپ دیوان وھد ءَ گوشتگ کہ بیست چار کلاکانی تہ ءَ دوئیں براتانی یل کنائینگ ءِ دلجمی داتگ بلے دوئیں برات انگت یل کنگ نہ بیتگ اَنت-