بلوچستان لبریشن فرنٹ ءِ جارکش میجر گوھرام بلوچ ءَ رسانکدر ءَ وتی شنگ کرتگیں درشان ءِ تہ ءَ گوشتگ کہ یازدہ اکتوبر آدینگ ءِ روچ ءَ گل ءِ دو سرمچار آواران ءِ ھند پیراندر سورک کور ءِ نیمگ ءَ پہ گل ءِ کارے ءَ سپر کنگ ءَ بیتگ اَنت کہ پاکستان ریاست ءِ جوڑ کرتگیں ڈیتھ اسکواڈ ءِ کارمنداں راہ ءِ سر ءَ سنگر گپتگ ءُ نندوک بیتگ اَنت۔ آیاں دوئیں سرمچاران ءَ دیستگ تیرگواری بندات کرتگ ءُ انگر کنگ ءِ جھد کرتگ، تیرگواری ءِ نشانگ ءَ آیگ ءَ کیپٹن طالب ءُ عادل شھید بیتگ اَنت۔
آئی ءَ گوشتگ کہ کیپٹن طالب پنام مودی ء میر محمد جھمنند دراسکی آواران 2012 ءَ بی ایل ایف ءَ ھوار بیتگ ءُ پہ بلوچستان ءِ آجوئی ءَ وتی زندگی ببا داتگ۔ آئی ءَ باز ھاسیں جنگاں بھر زرتگ ءُ دژمن ءَ جانی ءُ مالی تاوان داتگ۔ بیسیمگ رکشان، بالگتر، واشک، مشکے، آواران، کیچ، اورماڑہ ءُ گچک پنجگور ءَ جتائیں ھنداں پہ گل ءِ سوبمندیں آپریشناں آئی جوانیں کرد پیلو کرتگ۔
جارکش ءَ گوشتگ کہ شھید طالب گوں وتی ھمبلاں مھروان ءُ ھمدرد بیتگ، گوں ارادہ ءُ مھکمی ءَ پرکار بیتگ۔
آئی ءَ گوشتگ کہ ریاستی پوج ءَ شھید ءِ کھول مچی سزایانی نشانگ کرتگ دانکہ آئی ءَ نزور بہ کنت ءُ چہ راجی جھد ءَ دزکش بہ بیت۔ کھول ءِ مردم زوریں بیگواھی ءِ نشانگ کرتگ اَنت، آیانی لوگ جاگہ ماندارگ بیتگ اَنت ءُ آ پہ لڈ ءُ بار کنگ ءَ لاچار کنگ بیتگ اَنت چہ سرجمیں زوراکیاں ابید شھید ءِ ارادہ ءِ تہ ءَ کمی نہ یتکگ۔
جارکش ءَ گوشتگ کہ شھید ءَ درسیں جنجال ءُ ریاستی لشکر ءِ زوراکیاں ابید چہ راجی آجوئی ءِ وتی لوٹ ءَ پد کنز نہ بیتگ۔ آئی ارادہ ءُ دیمونی ھمے گپ ءِ منانک اَنت کہ جھد ءِ راہ ءَ دیم ءَ آتکگیں اڑاناں آئی توکل پروش دات نہ کرتگ۔ آئی دوازدہ سالانی جھد دیمونی ءِ لیکہ ءِ کرد ءِ درور اِنت ءُ گڈی ءَ شھیدانی کاروان ءِ بھر بیتگ۔
جارکش ءَ گوشتگ کہ شھید سرمچار عادل پنام ناصر ء نواب جھمنند زیارت ڈن، گوستگیں یک سالے بیت گوں بی ایل ایف ءَ کار ءَ بیتگ ءُ گل ءِ شھری نیٹورک ءِ بھر بیتگ، آ یک مھکم ارادہ ءُ وانندگ ءُ پہ سرڈگار ءِ آجوئی جھد ءَ وتی جان ءِ نہ چاریں نہ ترسیں سرمچارے بیتگ- دژمن ریاستی چیریں ادارھاں دوبر ءَ زوریں بیگواھی ءِ نشانگ کتگ بلے چہ سرجمیں آئی جھد ءِ تہ ءَ کمی آرگ ءَ بے سوب بیتگ اَنت۔
جارکش ءَ گوشتگ کہ دژمن ” ڈیتھ اسکواڈ ” ءِ سرجمیں کارمند پجارگ بیتگ اَنت ءُ سرجماں زوتاں چہ زوت آیانی گڈی ءَ آسر ءَ سر کن ایں۔ بلوچ راجی آجوئی زرمبشت ءِ بگیری ءَ پرکاریں ناشرکار ھچ وڑ ءَ بکشگ نہ بنت۔
میجر گوھرام ءَ گوشتگ کہ بی ایل ایف وتی نہ ترسیں ھمبل سرمچار شھید کیپٹن طالب ءُ شھید عادل ءَ اے گرانبھائیں دیمونی ءَ سُھرچکیں دروت ندر کنت ءُ ھمے کول ءَ کنت کہ شھیدانی کاروان ھر پیم ءَ وتی گڈی منزل ءَ سر کنگ بیت ءُ بلوچستان ءِ آجوئی ءِ واب راست کنگ بیت، ءُ دژمن ءَ آئی گڈی سیمسر ءَ سر کنگ بیت۔