نیو لیپٹ(New left) ھربرٹ مارکیوز
نبشتہ کار: شاھد اھمد
دی بلوچستان پوسٹ
نیولیپٹ مارکیوز ءِ لیکہ اِنت ھپتادمی کرن ءَ نودربرانی جُنز، ویت نام جنگ بگیری ءَ زھرشان ءُ ھیپی ازم ءِ وھدے کہ گپ بیت گڑا ھربرٹ مارکیوز ءِ نام الم گرگ بیت۔ دھون دھان بوتگیں چاگردی مُچّی، زالبول، اسلی زات، ءُ بے روزگارانی جیڑہ ءُ جنجالانی درا کنگ ءَ ءُ آیاناں زبان دیگ ءَ مارکیوز ءُ آئی ءِ ھواری زانتکاراں وتی کرد پیلو کتگ اَنت۔
مارکیوز ءَ را ” نیولیپٹ “ جنز ءِ بابا آدم گْوشگ بیت، اے پگری جُنز ءَ ھر دو امریکہ بلاک ءُ سویت بلاک ءِ سر ءَ نگد کنگ بوتگ۔
چوناھا ھربرٹ مارکیوز ۱۹ جولائی ۱۸۹۸ء ءَ جرمنی ءِ مزن شھر برلن ءَ ودی بیت۔ آئی ءِ کماش کارل مارکیوز گُدانی مزنیں کاروباری مردمے اَت ءُ پد ءَ رند ءَ اے پراپرٹی ءِ کاروبار ءَ دور کنت۔ ھربرٹ ءِ مات گرشی کر سلادسکی یک کمپنی ءِ مالکے ءِ چُک اَت۔
مارکیوز ءِ لیکہ:
مارکیوز ءِ پلسپہ ءِ ماڑی چہ ھیگل ءِ پلسپہ ءَ درچنگ بوتگ، ھمے واست ءَ مارکیوز ءِ پلسپہ ءِ بنیاد ایش اَت کہ ” بدلی چہ مجگ ءَ کَیت“۔ ھمے چار ءُ تپاس آئی ءَ را پرائیڈ ءِ نیمگ ءَ بُرت۔
کہ جبلی واھشات ءِ سرجم ءُ جند ءِ آجوئی ءَ بنیادی انسانی زلورت ایر کُت۔مارکیوز ءَ چاگرد ءِ انسان ءِ تَھنائی ءَ پَھمگ ءِ واست ءَ مارکسی لیکہ ءِ کُمک اوں زُرت ءُ چہ جبر ءَ آزات، دود ءُ ربیدگ ءِ دیدانک پیش کُت کہ ایشی ءَ وشی ءُ آسودگی بیت۔ چہ بے لزت ءَ ھزمت پیدا تَھنائی نہ بیت۔
نامداریں پلسپی ایرک پرام، مارکیوز ءِ گیشیں آزاتی ءِ لیکہ ءَ نا دوست اَت، ءُ لھتے مارکسی لیکہ ءِ منوکاں ھم مارکیوز ءِ لیکہ ءِ ھلاپ اِت اَنت کہ آئی ءَ پرائیڈ ءُ ھیگل ءِ وتی لیکھی رھبر منّوک اَت چمیشکا۔
یک جَھتی انسان:
مارکیوز ءِ بُنجاھی پگر ءُ چمشانک ”فرد“ اَت۔ آ آشوب ءِ سر ءَ اوں ھمے جندی دیدانک ءَ سر اَت۔ مارکسی زانوگر چاگردی بدلی ءِ گوم ءَ فرد ءِ دود ءُ دودمان ءِ مزنی ءَ بدلی ءِ ھم چمشانک داتگ بلے آ چاگردی بدلی ءَ اول سر ارزشت داتگ پرچاکہ چاگرد ”فرد“ ءِ مزنی ءَ جوڑ کنت۔ مردم ءِ جند ءِ سسا ءُ سما چہ مُچّانکی سسا ءُ سما ءَ ردوم زور اِیت۔ بلے چہ ایشی ءَ چپ مارکیوز ءَ گُشتگ کہ آشوبی بدلی ءِ واھش ” فرد“ ءِ اندری بود ءُ ھُنر بزاں ذھانت، جزبہ ءُ مکسد ءِ رھبند ءِ واست ءَ جوشے ھست بہ بیت۔ چوناھا اگاں ما بچاریں چو دوئیں لیکھانی تہ ءَ چُشیں پَرکے نیست، دوئیں آشوبی بدلی ءِ واست ءَ ”فرد“ ءِ ارزشت منّگ بیت بلے مارکیوز آشوبی بدلی ءِ بندات ءَ چہ ”فرد“ ءِ تہ ءَ لوٹ اِتگ، آ ”فرد“ ءِ تہ ءَ ھمے چیز لوٹ اتگ کہ کسے ءِ تہ ءَ بوت کنت یا نہ کنت ھم۔
مارکسی پلسپہ ءِ گُشگ اِنت کہ ھزمت انسان ءِ واست ءَ وت وتی درشان زات بزاں وتی پگر ءَ ڈَنّی ”تجسیم“ دیگ ءِ وسیلہ اِنت۔ وتی جندی لوٹ ءِ وسیلہ اِنت ءُ آئی ءِ ساچشتی اَمل اِنت۔
انسان چہ وتی ھزمت ءَ وتی انسانی ابرم ءَ درنگاز کنت۔ آ زانت کہ آ چے کنگ ءَ اِنت ءُ چے پیدا کنگ ءَ اِنت، ھزمت وت ءَ زانگ ءَ یک سمائی اَملے۔ ھزمت ءِ امل ءِ ساھت ءَ انسان وتی پیدا کُتگیں چیز ءَ چہ وت ءَ سیادی پیدا کنت۔ انسانی ھستی ءَ وتی بوگ ءُ ھست ءِ مارشت ءَ ھما وھد ءَ کنت وھدے آ ڈنّی، مادی ءِ معروضی دنیا ءَ ساچشت کنت۔ چہ ھزمت ءِ اَمل ءَ آ وت ءَ جانوراں، درچکاں، پُلاں، سِنگاں ءُ وت ءَ دگہ باز انچیں چیزاں نامدار کنت۔
اے مارکسی لیکہ ءِ راستی ءَ ما وتی اَملی زندگی ءَ ھما وھد ءَ دیست کنیں وھدے یک ازمکارے یک شَیرے تَرز دنت بزاں ساچشت کنت، کَسے بُتے کاری کنت کہ وتی مجگ ءَ کارمرز کنت یک نوکیں چیزے پیدا کنت، اے وھد ءَ آئی ءِ مجگی آسودگی چہ آئی ءِ دیم ءَ درا کنت۔ بلے سرمایہ داری چاگرد ءَ انسان ءَ وتی پیداک کنگ ءِ آجوئی یا واجھی نیست آ بس وتی ھزمت ءَ بھا کُت کنت آسر ءَ انسان (مزور) وت ھم یک چیزے جوڑ بیت، چہ ایشی ءَ مارشت مِر اَنت۔
مارکیوز اے منّ اِیت کہ آشوبی چاگردی بدلی ءِ واست ءَ واھش (صنعتی) چاگرد ءَ پیدا بوتگیں انسانی تَھنائی ءَ پروشگ ءَ اِنت۔ بلے آ تھنائی ءِ نادراھی ءَ بس سرمایہ داری چاگرد ءَ نہ گند اِیت بلکیں آ ایشی ءَ صنعتی چاگرد ءَ ھم گند اِیت ھمے واست آ اے مارشت ءَ تَھنا سرمایہ داری ملکاں انا بلکیں سوویت چاگرد ءَ ھم شوھاز اِیت۔ آئی ءِ گُشگ اِنت کہ انسان ءَ ھمے نوکیں صنعتی چاگرد ءَ وتی پیدا کتگیں چیز ءِ ھچ ارزشت ءُ مستری نیست۔ آ پیدا کُتگیں چیز ءِ وت گلام اِنت، آ وتی پجّار ءَ ھمے پیدا بوتگیں چیز ءَ وتی توسیپ ءَ کنت کہ آئی ءَ وت جوڑ کتگ، بلے گیشیاں پیدا کنگ ءِ سبب ءَ آ چیز نوں آئی ءِ نہ بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی اِنت-