دو بلوچ نودربراں ھوار سئے مردم پاکستانی لشکر ءَ دزگیر کتگ ءُ بیگواہ کرتگ اَنت۔
چہ پاکستان ءِ اُستان پنجاب ءَ ھالانی رد ءَ پاکستانی لشکر ءَ شپ ءِ دیر ءَ یک ھاسٹلے ءِ سر ءَ چھاپہ جتگ ءُ بلوچستان ءَ نندوکیں دو نودربر دزگیر کتگ ءُ ناشناسیں جاھے ءَ دیم داتگ اَنت ۔
بلوچ کونسل پنجاب ءِ رد ءَ پاکستانی لشکر ءَ پنجاب یونیورسٹی ءِ نودربر اکرم مینگل ءُ سپیریئر یونیورسٹی لاہور ءِ نودربر شمریز بادینی گیرکانونی وڑے ءَ آوار جتگ انت۔
آئی ءَ گْوشتگ کہ ما بلوچ نودربرانی سر ءَ اے وڑیں گیرکانونی ءُ زوراکی ءِ کارروائی ایر جن ایں ءُ وتی ھمبلانی سلامتی یل کنگ ءِ لوٹ ءَ کن اِیں۔
دوئیں ورنایانی پاکستانی لشکر ءُ پنجاب پولیس ءِ نیمگ ءَ پہ زور بیگواہ کنگ ءِ ویڈیو فوٹیج ھم بلوچ نودربرانی نیمگ ءَ شنگ کنگ بیتگ اَنت کہ اودا پنجاب پولیس ءُ سول کیپ پوشیں سلاھبند گندگ بنت۔
بلے رند ءَ پاکستانی لشکر ءَ اکرم مینگل یلہ داتگ وھدے کہ شمرز بادینی انگت بیگواہ اِنت۔
دومی نیمگ ءَ بلوچستان ءِ دمگ چہ خضدار ءَ ھال ھست کہ گوستگیں روچ ءَ سھب ءِ یازدہ ءِ نزیک ءَ پاکستانی لشکر ءَ چہ خضدار کوڈاسک ءَ یک کسان سالیں مسلم ء اختر سمالانی دزگیر کتگ ءُ برتگٹ
گوستگیں روچ ءَ پاکستانی لشکر ءَ بلوچستان ءِ صنعتی شھر حب چوکی ءَ چہ دو ورنا پہ زور بیگواہ کتگ اَنت۔
حب چوکی ءَ چہ زوراکی ءَ بیگواہ کنگ بوتگیں ورنا عبدالحمید ءِ چک جنید ءُ محمد اقبال ءِ چک عمران ءِ نام ءَ زانگ بوتگ اَنت۔