کراچی فدائی اُرش ءِ بھتام ءَ زالبولے ءَ ھوار بازیں مردمے آوار جتگ

کراچی پولیس ءَ ایئرپورٹ نزیک ءَ دوشی چینی شھریانی سر ءَ بیتگیں فدائی اُرش ءِ بھتام ءَ زالبولے ءَ ھوار بازیں مردمے دزگیر کنگ ءِ ٹاہ داتگ-

پولیس ءُ دگہ پورس رِد ءَ کراچی جناح ٹرمینل ءِ نزیک ءَ تراک ءِ پٹ پول برجاہ ءَ اِنت کہ اود ءَ زالبولے ءَ ھوار بازیں مردمے دزگیر کنگ بیتگ اَنت-

پٹ پولی ءِ گوشگ رِد ءَ کہ جیو فینسنگ ءَ شش ءَ ھشت نمبر شکی کنگ بیتگ اَنت- شکی ئیں نمبرانی سرجمیں ڈیٹ ءَ چیک کنگ ءَ اَنت ، اُرشکار ءَ نزیکیں ماڑی ءَ چہ کمک رسگ ءَ بیتگ-

پٹ پولی گوشگ رِد ءَ چینی انجینئرز درگت ءَ کہ آیاں سرپدی بیتگ آیاں ھم ھوار پٹ پول کنگ پیسلہ کنگ بیتگ-

زانگ بہ بیت کہ کراچی ائیرپورٹ سگنل ءِ نزیک ءَ یک اُرشے ءَ سے چینی کشگ بیتگ وھدے کہ اے وئیل ءَ ھپدہ مردم ٹپی ھم بیتگ اَنت-

پٹ پولی ادارھاں ٹاہ داتگ کہ چینی مردمانی سر ءَ وتکش تراک اُرش ءَ کارمرز بیوکیں گاڑی ءِ سرپدی گپتگ- چیسس نمبر ءَ چہ گاڑی ءِ واھنند ءِ نادرا ریکارڈ ھم دزگپتگ اَنت وھدے کہ اُرشکارانی کارمرزی ءَ موباھل فونز سمز ءِ ڈیٹا ھم یکجاہ کنگ بیگ ءَ اَنت-

زانگ بہ بیت کہ زی کراچی ءَ چینی شھریانی سر ءَ بیتگیں اُرش زمہ واری بلوچ لبریشن آرمی ءَ منّ اِتگ گْوشتگ کہ گل ایلیٹ فدائی یونٹ، مجید برگیڈ ءَ گوستگیں شپ ءَ کراچی ءَ جناح ائیرپورٹ ءَ چہ دراوکیں چینی انجنیئر ءُ سرمایہ کارانی یک بلاھیں کاروانے فدائی اُرش ءِ نشانگ کتگ پنچ ءَ گیش چینی انجینئر ءُ سرمایہ کار کشتگ اَنت ءُ دوازدہ ءَ گیش ٹپی کتگ اَنت، وھدے کہ آیانی پھازوکی ءَ کم چہ کم پانزدہ پاکستانی پوج کارمند مرتگ اَنت ءُ بازین ئِے ٹپی کتگ، آیانی تہ ءَ پاکستانی پوج ءُ چیریں ادراھانی چار ءَ گیش مزنیں آپیسر ھوار اَنت- تراک ءِ آسر ءَ کاروان ءَ ھوار پانزدہ گاڑی تباہ بیتگ اَنت- بی ایل اے ءِ ھیالداری رپکانی سبب ءَ چہ گنجان آباد ءَ جانی تاوان ءَ رکّ اِتگ- وھدے کہ بے دلیں دُژمن مدامی وڑ ءَ اے وڑیں سوبمندیں اُرش ءِ چیر دیگ واستا آئی ءَ آئل ٹینکر وئیل دیگ جھد کتگ، بلے اشی ءَ بے سوبی ءِ دیمپانی کنگ کپتگ- اے بی ایل اے ءِ ٹاھانی پدری اِنت کہ بلوچستان ءَ وتی پوج ءِ بے سوبی ءَ گند اَنت، دُژمنیں پوج پاکستان ءَ یکشل ءَ وتی تاوانانی چیر دیگ جھد کنگ ءَ اِنت- اے کاروائی بی ایل اے، مجید برگیڈ ءِ فدائی سنگت فدائی شاہ فھد پنّام آفتاب ءَ کتگ-