یک شمبے ءِ شپ ءَ کراچی بالی پٹ ءِ نزیک ءَ بلوچ لبریشن آرمی ءِ اَرش ءَ چین ءِ شھریانی بیرانی ءِ پد ءَ پاکستانی واکدارانی نیمگ ءَ ایرجنی برجاہ اَنت۔
پاکستان ءِ صدر آصف علی زرداری ءَ وتی یک بیانے ءِ تہ ءَ اے وئیل ایر جتگ ءُ تراک ءَ بیران بوتگیں مردمانی کھول ءِ گوما دلپدردی ءِ درشانی کتگ۔
صدر آصف علی زرداری ءَ گشتگ کہ راج دژمنیں مردم پاکستان ءِ دیمروئی ءُ وشحمھالی ءَ را تاوان دیگ لوٹ انت ءُ اے گپ ءَ گشتگ کہ اے وئیل ءَ ھواریں مردماں انساپ ءِ دیم ءَ آرگ ءِ ھاتر ءَ املی گامگیج چست کنگ بہ بیت۔
پاکستان ءِ مزن وزیر شھباز شریف ءَ گشتگ کہ آ اے وئیل ءَ چہ سک ھیران ءُ رنجیگ بوتگ آں۔
شہمھباز شریف ءَ اے تک ءِ سر ءَ گوشت کہ من اے زھرناکیں کارروائی ءَ را سک ایر جن آں ءُ چین ءِ سروکی ءَ گوں دلپدردی ءِ درشان کن آں ءُ ھاسیں رنگ ءَ بیران بوتگیں مردمانی کھول ءِ گوما دلپدردی ءِ درشان کن آں ۔
آئی ءَ گوشت کہ مجرمانی پجار ءُ کانود ءِ دیم ءَ آرگ ءِ واستا پٹ ءُ پول برجاہ انت، پاکستان وتی چینی دوستانی رکھینگ ءِ واستا جزمیگ انت۔ ما ایشانی جان سلامتی ءُ وشھالی ءِ ھاترا ھچ وڑیں سنگ ءُ ٹال نہ کن ایں-
پاکستان ءِ توکی کارانی وزیر محسن نقوی ءَ گشتگ کہ کراچی ءَ ناشرکاری اُرش چین ءِ شھریانی سر ءَ نہ انت بلکیں پاکستان ءِ سر ءَ انت، اے ارش ءِ سر ءَ دژمن ءَ را ترندیں پسو دیگ بیت۔
وفاقی وزیر داخلہ محسن نقوی اسلام آباد ءَ چینی سفارت خانہ ءَ سر بوتگ اودا آئی ءَ چینی سفیر جیانگ زیڈونگ ءَ گوں گند ءُ نند کتگ۔
وزیر داخلہ ءَ تراک ءِ تہ ءَ 2 چینی شھریانی بیرانی ءِ سر ءَ چینی سفیر ءَ را وتی دلپدردی ءِ درشانی کتگ، ھمے وھد ءَ چینی سفیر، ھکومت ءُ بیران بوتگیں چینی شھریانی کھولانی گوما یکوئی ءِ درشانی کتگ۔
زانگ بہ بیت گوستگیں شپ ءَ کراچی ءِ جناح انٹرنیشنل ایئرپورٹ ءِ دپ ءَ سگنل ءِ نزیک ءَ تراک بوتگ کہ ایشی ءِ زمہ واری بلوچ لبریشن آرمی ءَ من اتگ۔
اے گپ یات بہ بیت کہ اے سال ءِ توک ءَ بلوچ لبریشن آرمی ءِ مجید برگیڈ ءِ نیمگ ءَ بازیں اُرش کنگ بوتگ انت ۔ ایشانی تہ ءَ 26 اگست ءَ بلوچستان ءِ دمگ بیلہ ءَ سیکورٹی فورسز ءِ کیمپ ءِ دروازگ ءَ پُریں گولہ بارود ءِ گاڑی ءَ ٹکر جنگ ءَ پد آپریشن ھیروپ ءِ بندات بیتگ کہ کم چہ کم 130 لشکری کارمند مرتگ انت-