زھرشانی کنوکاں کمشنر مکران ءِ کارگس ءِ دیم ءَ زھرشانی نندانک داتگ ءُ وتی دوستیں مردمانی جان سلامتی ءِ لوٹ کرتگ ۔
دلجان بلوچ ءِ یل کنگ ءَ چہ آواران ءَ پہ زور بیگواہ کنگ بیتگ، مرچی آواران ءِ شھر ءَ چہ آئی ءِ کھول ءِ مردمانی نیمگ ءَ زھرشانی ءِ مچی یے برجم دارگ بیتگ۔
مچی ءِ تہ ءَ مزنیں کساسے ءَ مردین، زالبول ءُ زھگاں بھر زرتگ۔
زھرشانی کنوکاں ڈپٹی کمشنر ءِ کارگس ءِ دیم ءَ زھرشانی نندانک داتگ ءُ دلجان بلوچ ء اللہ بکش ءِ سلامتی ءِ لوٹ کتگ کہ اے سال ءَ 12 جون ءَ پاکستانی لشکر ءَ چہ آواران تیرتیج ءَ دزگیر کتگ۔
اے تک ءِ سر ءَ دمگ ءِ نندوکیں مردمانی ھمراھی ءَ زھرشانی نندانک ءَ دگہ بیگواھیں مردمانی کھول ءَ ھم بھر زرتگ ءُ آواران ھوار چہ بلوچستان ءَ پہ زور بیگواھیں مردمانی یل کنگ ءِ لوٹ کتگ-
اے تک ءِ سر ءَ بیگواھیں دلجان بلوچ ءِ کھول ءِ مردماں گْوشتگ کہ بلوچستان ءِ دمگ آواران بربریت ءِ درور اِنت، اِد ءَ پہ زور بیگواھیں روچ پہ روچ گیش بوگ ءَ اِنت۔ ھمے رنگ ءَ 12 جون 2024 ءَ پاکستانی لشکر ءِ ھپت گاڑیانی سر ءَ ھواریں لشکر ءَ تیرتیج ءَ مئے لوگ ءِ سر ءَ اُرش کُتگ ءُ مئے مھروانیں دلجان مئے چمّانی دیم ءَ برتگ ءُ آئی ءِ بارو ءَ ھچ سرپدی نیست کہ آ کجام جاور ءَ اِنت۔
آئی ءَ گوشتگ کہ ما چہ دمگدار ءُ مزنیں اگدہ داراں گوں دزبندی کن ایں کہ دلجان ءِ وش ءُ سلامتی ءِ واستا وتی انسانی کرد ءَ پیلو بہ کن انت، اگاں دلجان سلامتی ءَ یل نہ بوت گڑا ما وتی زھرشانی ءَ را گیش کن ایں-