میان رودراتک ءَ جنگ ءِ گمان
ٹی بی پی شونگال
دو اکتوبر ءِ شپ ءَ ایران ءَ بازیں کچے ءَ بیلیسٹک میزائلاں گوں اسرائیل ءِ سر ءَ اُرش کتگ- ایران ءِ گوشگ اِنت کہ اسرائیل ءِ لشکری اُرد جاہ نشانگ کتگ اَنت ءُ اے اُرش ھماس ءِ سروک اسماعیل ھنیہ، ھزب اللہ ءِ سیکریٹری جنرل ھسن نسراللہ ءُ بریگیڈیر نیلفروشان ءِ کوش ءِ پسو ءَ کنگ بیتگ انت ءُ پاسداران ءِ انکلاب ءَ بیھار داتگ کہ اگاں اسرائیل ءَ ایرانی لوٹانی پژدر ءَ پسھی اُرش کت گڑا دیم ءِ پسھی اُرش ایشی ءَ چہ ھم گیش ترند تر بیت اِنت- اسرائیل ءَ ایران ءِ میزائل اُرشانی پسو دیگ ءِ جار جتگ بیتگ-
ھپت اکتوبر دوھزار ءُ بیست ءُ سَے ءَ ھماس ءَ اسرائیل ءِ سر ءَ اُرش ءَ پد میان رودراتک ءَ جنگ ءِ برانز چِست بیتگ اَنت بلے یکم اپریل دوھزار ءُ بیست ءُ چار ءَ اسرائیل ءَ شام ءِ بنجاھی شھر دمشق ءَ ایرانی سپارت ھانہ ءِ سر ءَ اُرش کتگ ات- چریشی ءَ بریگیڈیر مھمد رضا زاھدی ءُ دومی آپیسرز کشگ بیتگ اَنت- چریشی ءِ پسو ءَ بیست ءُ چار اپریل ءَ ایران ءَ اولی رند ءَ تچک ءَ اسرائیل ءِ سر ءَ میزائل ڈرون اُرش کتگ ات ءُ ھردوکیں ڈیھ جنگ ءَ کمانیگ بیتگ اَنت بلے میان اُستمانی زورانی جھداں پد جنگ دارگ بیتگ-
ایران ءِ بنجاھی شھر تھران ءَ پلستینی رھشون ءِ مرگ ءَ پد جنگ ءِ ءِ برانز گیشتر چِست بیتگ ءُ اسرائیل ءَ لبنان ءِ سر ءَ بازیں کچے ءَ برزی اُرشاں ھزب اللہ ءِ سروک ءُ آئی ءِ جنرل سیکریٹری ھسن نسر اللہ ءِ بیرانی ءَ ایران ءَ دوبر اسرائیل ءِ پد ءَ مزنیں کچے ءَ اُرش ءِ شون بیتگ- چریشی ءَ پد میان رودراتک ءَ پد ءَ جنگ ءِ کمان چِست اَنت اسرائیل ءِ نیمگ ءَ ایران ءِ پسھی اُرش ءَ سرجم ءَ جنگ ءِ سبب بیت کت کنت اِنت- چریشی ءَ امریکہ ھوار بیت اِنت ءُ شام، عراق،یمن ءُ اردن ءَ ھوار بازیں ڈیھ جنگ ءِ لپیٹ ءَ کاینت اِنت-
ایران بلوچانی ھمساھگیں ڈیھ اِنت ءُ اسرائیل ءِ گون ءَ سرجمی ءَ جنگ ءَ جنگ ءِ پاھار بلوچستان ءَ سر بیت کن اَنت ءُ گولڈ سمڈ لائن ءَ ھردوکیں نیمگاں بلوچانی واپاری ءُ سیاسی سان ناگیگ بیت کت کنت اِنت- بلے بلوچ راجدوست کواس اے درگت ءَ جتائیں لیکہ دار اَنت چُشکہ گمانی رنگ ءَ ایران – اسرائیل جنگ، بلوچ زرمبشت ءِ آجوئی ءِ واستا یک گچینی وھدے بیت اِنت یا بربادی –