بلوچ اسٹوڈنٹس ایکشن کمیٹی ءَ وتی شنگ کتگیں درشان ءَ گوشتگ چار روچی کتاب مراگاہ “بلوچستان کتاب کاروان” ءِ نام ءَ کیچ ءِ دمگ مند ءَ برجم داشتگ کہ گوں سوب مندی ءَ آسر بوتگ۔
شنگ بیتگیں درشان ءَ گوشگ بیتگ کتاب مراگاہ مند ءِ چار جتاجتائیں جاھاں کہ آیانی تہ ءَ مند سورو مین بازار، گورنمنٹ بوائز ھائی اسکول سورو، زبیدہ جلال سکنڈری اسکول سورو ءُ گورنمنٹ گرلز ھائی اسکول سورو ءَ برجم دارگ بیتگ انت۔
شنگ بیتگیں درشان ءَ گوشتگ بیتگ کتاب میڑہ ءَ بلوچی زبان ءِ جتاجتائیں سرھالانی سر ءَ کتاب ، ادب، سیاست، فلسفہ، بلوچ راج دپتر ءُ دنیا ءِ دپتر ءُ دگہ جتا جتائیں بن گپانی سر ءَ کتاباں ھوار گل ءِ سئے ماھی تاک نوشت ءُ زھگانی تاک گام ھم ھوار بیتگ اَنت۔
شنگ بیتگیں درشان ءَ گوشگ بیتگ چار روچی کتاب مراگاہ 22 ستمبر ءَ بندات کنگ بیتگ، کتاب مراگاہ ءِ اولی روچ سورو مین بازار ءَ برجم دارگ بیتگ۔ کتاب مراگاہ ءِ اولی روچ ءَ بازار ءِ مردماں مزنیں کچے ءَ بھر زُرتگ ءُ وتی ھبداریں کتاب پہ وانگ ءَ بھا زرتگ اَنت کہ آیانی تہ ءَ گیش تر کتاب بلوچ راجدپتر ءُ بلوچی ادب ءَ گوں بندوک بیتگ اَنت۔ کتاب مراگاہ ءِ دومی روچ 23 ستمبر ءَ گورنمنٹ بوائز ھائی اسکول سورو ءَ برجم دارگ بیتگ۔ دومی روچ ءَ اسکول ءِ نودربراں کتاب مراگاہ ءَ بھر زرتگ ءُ کتاباں گوں وتی ھُب ءُ واھگ درشان کُتگ۔ ھمے وڑ ءَ کتاب مراگاہ سیمی روچ ءَ زُبیدہ جلال سکنڈری اسکول سورو ءَ رمس 24 ستمبر ءَ برجم دارگ بیتگ ءُ استاد ءُ ایدگ مرداماں ھوار گیش نودربراں پہ وت ءَ کتاب زُرتگ۔ کتاب مراگاہ ءِ چارمی ءُ گُڈی روچ جنکانی وانگجاہ گورنمنٹ گرلز ہائی اسکول سورو ءَ برجم دارگ بیتگ کہ اود ءَ جنک ایں نودربراں اتکگءُ کتاب میڑہ سیل کنان ءَ وتی دوستی ئیں کتاب پہ وانگ ءَ زرتگ ۔
شنگ بیتگیں درشان ءَ گوشگ بیتگ ھمے پیم کراچی ءَ یک روچی کتاب میڑھے کراچی مزن شاہ دربرجاہ ءَ ھم برجم دارگ بیتگ کہ اود ءَ ورنا ءُ نودربراں ھوار استاداں بھر زرتگ ءُ پہ وت وانگ ءَ کتاب زرتگ۔
آئی ءَ گوشتگ بلوچستان کتاب کاروان ءِ نام ءَ چار روچی کتاب مراگاہ ءَ استاد، شائر، ادیب، نودربر، زھگ ءُ زالبولاں ھوار دمگ ءِ ایندگہ لس مردماں مزنیں کچے ءَ بھر زرتگ ءُ وتی دوستی ئیں کتاب پہ وانگ ءَ زُرتگ اَنت۔ مند ءَ نودربر ءُ لس مردماں گل ءِ مراگاہ “بلوچستان کتاب کاروان” کہ آئی ءِ مول ءُ مراد بلوچستان ءِ ھمک شھر ءُ دمگاں کتابی ربیدگ ءِ دیمروئی دیگ ءُ وانگی چاگردے جوڑ کنگ اِنت نہ تھنا ساڑاتگ بلکیں دیمتر ءَ ھم اے وڑیں کتاب مراگاھانی برجم دارگ ءِ لوٹ کُتگ۔ گل ءِ برجم داشتَگیں چار روچی کتاب میڑہ ءِ چاریں روچانی سرجم بیگ ءَ پد کتاب مراگاہ گوں سوبمندی ءَ آسر کنگ بیتگ۔
شنگ بیتگیں درشان ءَ گوشگ بیتگ بلوچ اسٹوڈنٹس ایکشن کمیٹی ءِ کتاب میڑھانی مھم بلوچستان کتاب کاروان ءِ مول ءُ مراد بلوچ چاگرد ءِ تہ ءَ کتاب دود ودی کنگ ءُ ورنا ءُ نودربراں ھوار ایدگہ مردماں زانت ءُ زانشت ءَ چہ آژنا کنگ ءُ ورنایاں چہ چاگردی سلکاری ءَ دارگ ءُ آئی ءِ جاہ ءَ کتاب دود آرگ اِنت۔