بلوچستان لبریشن فرنٹ ءِ جارکش جارکش میجر گْوھرام بلوچ ءَ رسانکدر ءَ وتی شنگ کرتگیں درشان ءِ تہ ءَ گوشتگ کہ سرمچاراں کولواہ، دشت، زامران ءُ کلات ءَ چار جتاجتائیں اُرشاں دژمنیں پوج ءِ راشن دستیگ کتگ اَنت، ھال اھوالی نزام، پوج ءِ واٹر سپلائی سسٹم ءُ زورگریں پوج ءِ چوکی نشانگ کتگ اَنت۔
جارکش ءَ گوشتگ کہ آواران ءِ ھند کولواہ ءَ زوگریں پاکستانی پوج ءِ راشن دستیگ کتگ اَنت ءُ ڈرائیور کڈن کنگ ءَ پد یل داتگ۔
جارکش ءَ گوشتگ کہ سرمچاراں آواران ءِ ھند کولواہ کنیچی ءَ بیست ءُ دو ستمبر یک شمبے ءِ بیگاہ ءِ شش ءَ ٹریکٹر ءَ پُریں راشن ھما وھد ءَ دستیگ کتگ اَنت کہ آ چہ گیشکور ءِ بنجل ءَ کنیچی ءِ نیمگ ءَ روگ ءَ بیتگ۔ سرمچاراں سوبمندیں بیڑ ءَ ریاستی پوج گیشتر سسائی آزارانی دیمپان کتگ۔
جارکش ءَ گوشتگ کہ پروش وارتگیں دژمنیں پوج چہ بلوچ سرمچارانی ترس ءَ وتی راشناں لس مردماں چہ داں بنجل ءَ برگ ءَ اِنت کہ ایشی سدکیں پروش ءِ منانک اِنت۔
جارکش ءَ گوشتگ کہ ما باز براں لس مردم ءُ ٹرانسپورٹر کڈن کتگ اَنت کہ آ زورگر ءِ کمک ءُ چہ کمکاری ءَ وت ءَ گستا بدار اَنت، اگاں نہ آ وتی جان ءُ مال ءِ تاوان ءِ زمہ وار وت اَنت۔
جارکش ءَ گوشتگ کہ دگہ یک اُرشے ءَ سرمچاراں بیست ءُ دو ستمبر ءِ شپ ءِ ھشت ءَ کیچ ءِ ھند دشت کاشاپ ءَ برجاھیں زونگ موبائل ٹاور تیرگواری کتگ ءُ مشین ءُ سامان تباہ کتگ اَنت۔
جارکش ءَ گوشتگ کہ سیمی اُرش ءَ سرمچاراں 23 ستمبر ءِ بیگاہ ءِ شش ءَ کیچ ءِ ھند زامران، مسکین گر تگران ءَ برجاھیں پاکستانی پوج ءِ واٹر سپلائی سسٹم تیرگواری کتگ ءُ تباہ کتگ۔
جارکش ءَ گوشتگ کہ 25 ستمبر ءِ بیگاہ ءِ چار ءَ کلات ءِ ھند شاہ مردان ءَ برجاھیں ایف سی ءِ چیک پوسٹ ءِ سر ءَ گوں وتکاریں سلاھاں اُرش کتگ، اُرش داں بیست ملٹ ءَ برجاہ بیتگ، اُرش ءَ دژمن ءِ یک کارمندے مرتگ ءُ دو ٹپی بیتگ اَنت۔
میجر گْوھرام بلوچ ءَ گوشتگ بلوچستان لبریشن فرنٹ اُرشانی زمہ واری منّ اِیت ءُ داں بلوچستان ءِ آجوئی ءَ وتی اُرشاں برجاہ دار اِیت۔