بلوچستان : تیرگواری ءُ دگ وئیل ءَ زالبولے ءَ ھوار دہ مردم بیران

بلوچستان ءِ جتاجتائیں دمگاں تیرگواری ءُ دگ وئیلاں چہ زالبولے ءَ ھوار شش مردم بیران چار ٹپی بیتگ اَنت-

وئیل بلوچستان ءِ بُنجاھی شھر شال، ھُزدار، دالبندین، پنجگور ءُ سوراب ءَ بیتگ اَنت-

سوراب بتگو چوکی نزیک ءَ ویگن ءُ فیلڈر ءَ تُرسناکیں ڈک ورگ آسر ءَ سے مردم بیران ءُ دو ٹپی ئیں مردمانی جاور نگیگ اَنت سول نادُراھجاہ ءَ برگ بیتگ اَنت-

دومی نیمگ ءَ شال ءِ دمگ عیسیٰ نگری ءَ تیرگواری وئیل بیتگ، پولیس رِد ءَ تیرگواری ءِ وئیل ءَ زالبول ءَ ھوار دو مردم بیران بیتگ اَنت-

تیرگواری وئیل ءَ بیران بیتگیں مردم ءِ لاش نادُراھجاہ برگ بیتگ-

ھمے وڑ چہ پنجگور ءَ چتکان کاھانی منڈی ءَ ناشناسیں سلاہ بندیں مردمانی تیرگواری ءَ چہ یک مردمے بیران بیتگ وھدے کہ یکے ٹپی بیتگ-

دومی نیمگ ءَ دالبندین ءَ بیتگیں جتاجتائیں وئیلاں دو مردم بیران بیتگ وھدے کہ ھُزدار ایدھی سینٹر نزیک ءَ پرپٹ ءُ کوچ ءِ میان ڈک ورگ آسر ءَ دو مردم بیران یکے سک ٹپی بیتگ-