چہ پنجاپ ءَ بلوچستان ءِ نودربر بیگواہ

پاکستان ءِ استان پنجاپ ءَ بلوچستان ءِ نودربر پوج ءِ دست ءَ آوار جنگ ءَ پد بیگواہ کتگ-

ھامد بلوچ ء ھان مھمد جھمنند کیچ بلیدہ پاکستانی پوج ءَ استان پنجاپ ءِ شھر سرگودھا بھادر شاہ دگ ءَ آوار جتگ ءُ برتگ-

بیگواہ کنگ بیتگیں نودربر ھپتمی سمسٹر ءِ سوشیالوجی، یونیورسٹی آف سرگودھا ءَ وانگ ءَ اِنت ءُ آئی ءِ ھمراھیں نودربر ءُ کھول ءَ یل کنگ ءِ لوٹ کتگ-

گوستگیں بیست ءُ چار ساھتانی میان ءَ پنچ بلوچ ورنایانی زورانسری بیگواھی ءِ اھوال رپورٹ بیتگ اَنت-.گوستگیں روچ ءَ کلات ءُ گوادر ءَ چار ورنا آیانی لوگ ءُ پاکستانی پوج ءَ چیک پوسٹانی سر ءَ آوار جتگ اَنت-

بلوچستان ءَ ھوار پنجاپ ءُ دگہ ھنداں بلوچانی بیگواھی ءِ اھوال رپورٹ بوگ ءَ اَنت- اے بیگواھیں مردمانی تہ ءَ گیشتریں کساس نودربرانی ئیگ اِنت-

پاکستان ءِ اُستان پنجاپ ءَ بلوچ نودربراں پاکستانی چیرین ادارھانی نیمگ ءَ پروفائلنگ ءُ بیمانی دیمپانی اِنت ءُ اے درگت ءَ نودربراں آمیدگساں وتی گپ برتگ بلے اے وئیل انگت دارگ نہ بیتگ اَنت-

ایشی ءَ ابید پنجاپ ءَ وانوکیں بلوچ نودربراں نیکراھی ءُ دگہ ٹولیانی نیمگ ءَ ھم لٹ ءُ کُٹانی دیمپانی اِنت-

دو روچ ءَ پیش پنجاپ یونیورسٹی لاھور ءَ بلوچ نودربرانی سر ءَ جمعیت طلبہ اسلام ءِ باسکاں لٹ ءُ کٹ کتگ انت ءُ جمعیت طلبہ ءَ آس دیوکیں سلاہ کامرد کتگ ءُ بلے پولیس ءَ بیڑ برتگ ءُ بلوچ نودربر گپتگ اَنت-

وئیل ءَ زدگ بیتگین دو نودربرانی جاورھال ناگیگ اَنت ءُ جمعیت طلبہ ءُ پولیس ءِ ھلاپ ءَ بلوچ نودربر زھرشانی کنگ ءَ اَنت ءُ آیاں گوشتگ کہ جمعیت ءِ گُنڈایاں پولیس ءِ گون ءَ ھوار بیتگ ءُ بلوچ نودربراں وانگجاھاں کشگ ءُ آیاں یونیورسٹیان درکنگ ءِ جھد ءَ اَنت-

سرجمیں بلوچستان ءَ روچ پہ روچ زورانسری بیگواھیانی کیس دیم ءَ آیگ ءَ انت۔ ٹی بی پی ڈیٹا ویژول اسٹوڈیو ءِ کچ ءُ کساسانی رد ءَ اگست ءِ ماہ ءَ سرجمیں بلوچستان ءَ چہ 37 مردم پہ زور بیگواہ کنگ بوتگ اَنت وھدے کہ 9 بیگواھیں مردم یل بیتگ انت ءُ 6 لاش دست کپتگ انت۔