گوادر کوسٹ گارڈ رویش ءِ ھلاپ ءَ نندانک گپ ءُ دیوان ءَ پد ھلاس کتگ

مکران کوسٹل ھائی وے سر ءَ برجاھیں نندانک چار روچ ءَ پد ھلاس، کوسٹل ھائی وے پچ کنگ بیتگ-

بلوچستان ءِ تیاب دپی شھر گوادر ءَ پک اپ ڈرائیور ءُ ڈپو واھنند ءُ سیاسی پارٹیاں پاکستان ایران سیمسر ءَ باپاری ءِ دارگ ھلاپ ءَ چار روچ ءَ چہ برجاھیں نندانک انتزامیہ ءَ گوں سوبمندی گپ دیوان ءَ پد ھلاس کنگ بیتگ-

گپ دیوان ءَ پد پک اپ ءُ ڈپو واھننداں کوسٹل ھائی وے سر ءَ نندانک ھلاس کتگ شھدگ گاڑیانی واستا روگ آیگ پچ کتگ اَنت-

زانگ بہ بیت کہ ڈپو واھنند ءُ پیک اپ یونین ءَ وتی لوٹانی ھک ءَ گوستگیں چار روچ ءَ چہ سربندن کراس ءُ زیروپوائنٹ ءَ مکران کوسٹل ھائی وے سر ءَ نندانک داتگ زھرشانی ئیں نندانک بُنجلے برجم داشتگ-

نندانک ءَ آل پارٹیز ءُ ھک دو تھریک ءِ ھم پلامرزی گون بیتگ، گپ دیوان ءَ پد اے سی گوادر میر جواد زھری ءَ ایر کتگیں نکتاھانی جار جنان ءَ گوشتگ کہ کنٹانی ھور شمبے ءَ پنچ روچ ءَ پچ بیت، تلار ءُ کارواٹ ءَ چہ کسانیں گاڑیانی واستا اڑاناں دیر کن ایں-

دوئیں ھندانی سر ءَ شپ وھد ءَ نندانک ھلاس کنگ ءَ پد گوادر شال ءُ گوادر کراچی شھدگ ھرچ وڑیں روگ آیگی ءَ پچ کتگ اَنت-