سمی دین بلوچ ءِ سپری بندش: آمیدگس ءَ پیشی، واکدار پیش نہ بیتگ اَنت

پاکستان ءِ ادارہ کانون ءُ آئینی ادارھانی شرپ ءَ نادلگوش اَنت- سمی دین بلوچ

انسانی ھکانی ءِ بلوچ باسک ءُ زورانسری آوار جنگ بیتگیں ڈاکٹر دین بلوچ ءِ جنک سمی دین بلوچ ءَ درملک ءِ روگ ءَ سپری بندش ءِ درگت ءَ سندھ ھائی کورٹ ءَ یاداشت کتگیں کیس ءِ دومی آمیدگسی پیشی بیتگ-

سندھ ھائی کورٹ ءِ ڈن ءَ رسانکدراں تران کنان سمی دین بلوچ ءَ گوشتگ کہ پیشی ءِ وھد ءَ آمیدگس ءَ وزیر دفاع، ایف آئی اے ءُ دگہ واکداراں نوٹس دیان ءَ پیش بوگ ءُ پسو دیگ ءِ ھکم داتگ بلے دومی پیشی ءِ وھد ءَ واکدارانی ھچ کس آمیدگس ءَ پیش نہ بیتگ ءُ آمیدگس ءَ دومی پیشی یک ھپتگے ءِ واستا مھتل کتگ-

سمی دین بلوچ ءَ گوشتگ اے بژنی گپے ءُ اے ڈیھ ءِ کانونداریں ادارھانی گور ءَ ھستیں ناپھتوئی ءَ پدر کنت اِنت ءُ آ ایوک ءَ آمیدگسانی بلکین کانون ءُ آئین ءَ مانیارگ ءَ اَنت-

اھوالکاراں گوں تران کنان ءَ بلوچ باسک ءَ گوشتگ ریاست پسو دیگ ءَ بے تھمبل انت آ کجام بنیاد ءَ منی سر ءَ بندش جنگ ءَ اِنت من یک پرایمنیں سیاسی باسکے آں ءُ تی جد ءُ جھد ءَ برجاہ داراں-

زانگ بہ بیت کہ اے ماہ ءَ سمی دین بلوچ عمان ءَ روگ ءِ وھد ءَ ایف آئی اے ءَ کراچی ءِ بالی پٹ ءَ اوشتارینتگ آئی ءَ را گشگ بوتگ کہ بلوچستان سرکار ءِ نیمگ ءَ آئی ءِ سر ءَ سپری پابندی جتگ۔

سمی بلوچ ءِ سفری بندش ءِ ھلاپ ءَ ایگزٹ کنٹرول لسٹ ءَ ھوار کنگ ءَ میان استمانی گلاں تُرندی ءَ ایر جتگ ءُ پاکستان ءَ چہ لوٹ کتگ کہ آ بندش دیر بہ کنت ءُ انسانی ھکانی باسکاں تنگ کنگ ءَ بند بہ کنت۔