انسانی ھکانی گل رپیک اومان ءِ بیگواھی ءِ ھلاپ ءَ وتی توار چست بہ کن اَنت کہ سالانی سال اِنت بیگواہ اِنت جنک ءِ لوٹ
تربت پریس کلب ءَ پریس کانفرنسے ءِ وھد ءَ اسکول ءِ بیگواھیں استاد رپیک اومان ءِ جنکاں لوٹ کتگ کہ 10 سال اِنت کہ بیگواہ اِنت رپیک اومان ءِ پٹ ءُ پول نہ کنگ ءِ ھلاپ ءَ انسانی ھکانی گل وتی توار ءَ چست بہ کن اَنت۔
رپیک اومان ءِ چکاں گشت کہ مرچی 10 سال بیت کہ رپیک اومان بیگواہ بوتگ بلے انگت ءَ آئی ءِ بابت ءَ ھچ وڑیں وشیں ھال دیگ نہ بوھگ ءَ انت آھاں گیش گشتگ کہ ھدا ءَ مارا رپیک اومان ءِ درآیگ کنگ ءَ چہ اے دراجیں آزار ءَ رکینتگ یا آ بہ بنت۔ آمید گس ءَ پیش کنگ بوتگ۔
بیگواھیں اسکول ءِ استاد رپیک اومان ءِ چُکاں گْوشتگ کہ ما وت ھم نہ زان ایں کہ آ زندگ اِنت یا نہ اِنت۔
آئی ءَ گیش گْوشت کہ سرکار ایشاں زوت پچ بہ کنت ءُ انسانی ھکانی گل ایشانی پچ گرگ ءِ واست ءَ توار چست بہ کن انت پریس کانفرنس ءِ وھد ءَ بیگواھیں سنگت ءِ کسانیں جنک چہ گم ءَ بے ھوش بوتگ۔
یات بہ بیت کہ 21 ستمبر 2014 ءَ چہ وتی سرکاری کاراں تربت ءَ واتر بوگ ءِ وھد ءَ اسکول ءِ استاد رپیک اومان پاکستانی لشکر ءُ انٹیلی جنس ادارھانی دست ءَ دزگیر کنگ بوتگ ءُ ناشناسیں جاھے ءَ دیم دیگ بوتگ، چہ ھما وھد ءَ آ راج ءِ دیم ءَ گندگ نہ بوتگ۔
رپیک اومان ءِ زوراکیں بیگواہ کنگ ءَ پد آئی ءِ کھول ءُ چُکاں باز رند ءَ زھرشانی کتگ بلے دہ سال ءِ گوزگ ءَ پد ھم رپیک اومان راج ءِ چماں نہ اتکگ۔