پاکستان ریلوے ءَ ٹاہ داتگ کہ آپریشن ہیروف ءَ آماچ بوتگیں پُھل 15اکتوبر ءَ تاں ریل آپریشن ءِ واستا پچ کنگ بیت انت۔
واکداراں گشتگ کہ ریلوے ءِ سی ای او ءِ گوشگ ءِ پد ءَ پھل ءِ بھالی ءِ کار دو شپٹ ءَ برجاہ انت ریلوے وتی وسیلگاں چہ پھل ءِ بھالی ءِ کار ءَ کنگ ءَ انت۔
واکداراں گشتگ سیکورٹی کلیئرنس ءَ چہ پد بلوچستان ءِ ریل ءِ راہ زوت پچ کنگ بیت اِنت-
زانگ بہ بیت کہ ریلوے ءِ واکداراں گشتگ ات کہ جعفر ایکسپریس ٹرین سروس ءِ بند بوھگ ءِ سبب ءَ روچے ءِ سر ءَ نزیک ءَ 10 لکھ کلدار ءِ تاوان بوھگ ءَ انت وھدیکہ اسر ءِ سبب ءَ بولان میل ءَ ماہانہ یک کروڑ کلدار ءِ تاوان ءِ گمان انت۔ اے وڑیں جاور ھال ءَ اگاں دوئیں ٹرین ءِ سروس یک ماہے ءَ بند بہ بنت گڑا ریلوے ءِ مھکمہ ءَ را ہر ماہ 4کروڑ کلدار ءَ چہ گیش ءِ تاوان رس ایت۔
یات بہ بیت کہ بلوچ لبریشن آرمی ءِ آپریشن ھیروف ءِ وھد ءَ نوشکی، مستونگ، کوئٹہ ءُ سبی ءَ شش جاگہ ءَ تراکانی تہ ءَ ریل ءِ پٹری تباہ بیتگ اَنت۔
ریلوے پھل ءِ تباہی ءِ سبب ءَ کوئٹہ ءِ ریل ءِ روگ ءُ آیگ پنجاب، سندھ ءُ خیبرپختونخوا ءَ گوں سستگ-