مشکے ءَ پوجی آپریشن برجاہ

مشکے ءِ جتا جتائیں جاھاں پاکستانی پوج ءِ آپریشن برجاہ اِنت-

بلوچستان ءِ دمگ مشکے ءَ پاکستانی پوج جتا جتائیں جاھاں آپریشن کنگ اِنت- پوج ءِ بازیں گاڑی ءُ موٹرسائیکلاں ھوار پندی لشکری تر ءُ گرد کنگ ءَ اَنت-

دمگی مردمانی رد ءَ پوجی کارندھانی ھمراھی ءَ ڈیتھ اسکواڈ ءِ کارمند ھم آپریشن ءَ ھوار اَنت- بزی، خلکلوک، مرماسی، کلیڑ، پُھچڑ ءُ کش ءُ گوری دمگ آپریشن ءِ زد ءَ اَنت-

پاکستانی پوج ءَ اے درگت ءَ ھچ وڑیں اھوال دیم ءَ نیاؤرتگ اَنت-

زانگ بہ بیت بلوچستان ءِ جتا جتائیں جاھاں پوجی آپریشنانی بندات کنگ بیتگ اَنت- گوستگیں روچاں بولان ءُ آئی ءَ ھواریں دمگاں بازیں کچے ءَ پوجی آپریشن کنگ بیتگ اَنت-

ھمے ڈول ءَ کلات ءُ مستونگ ھم پوجی آپریشن ءِ زد ءَ بیتگ اَنت-

ایشی ءَ پیش پاکستانی پوج ءَ کلات ءَ آپریشن ءِ وھد ءَ دو مردمانی کُشگ ءِ ٹاہ داتگ اَت پد ءَ اے دروگیں مکابلہ گوشگ بیتگ –