چہ شال ءَ زورانسری بیگواہ مھر گل مری ءِ گھار ءَ شال پریس کلب دیم ءَ ّزورانسری آوار جنیانی ھلاپ ءَ وائس فار بلوچ مسنگ پرسنز ءِ برجاھیں گدان ءَ چہ پریس کانفرنس کنان ءَ گْوشتگ کہ منی برات مھر گل مری مروچی چہ نُھ سال ءَ ساری پاکستانی پوج ءُ چیریں ادارھانی نیمگ ءَ چہ بیگواہ کنگ بیتگ کہ انگت بیگواہ ءَ اِنت-
آئی ءَ گْوشتگ کہ ما اے بیگواہ بیتگینانی ھلاپ ءَ کیس کتگ ءُ آمیدگس ءِ پرمان داتگ کہ ایم آئی ءُ ایف سی زوت ءَ زوت مھر گل مری ءَ یل بہ کن اَنت بلے بدبھتی ءَ چہ آمیدگس ءِ پرمان گوات ءَ داتگ اِت ءُ تاں انگت منی برات ءِ ھچ وڑیں ھال نیست-
آئی ءَ گْوشتگ کہ منی برات زراعت ءَ ھژدہ گریڈ آپیسرے بیتگ ءُ آ ڈیرہ بگٹی ءَ وتی کار ءَ دلگوش بیتگ ما وتی برات ءِ یل کنائینگ ھاتر ءَ ھرچ وڑیں در ٹُک اِتگ اَنت، ما ریڈزون ءَ ھورانی سبب ءَ یکشل ءَ چل روچ ءَ تاں آئی ءِ یل کنائینگ ھاتر ءَ نندانک داتگ بلے انگت آئی ءِ درگت ھچ ھال نہ رس اِتگ دو رند ءَ اسلام آباد ءَ ھم نندانک داتگ بلے اود ءَ نا اُمیتی ءَ اَبید ھچ نہ رس اِتگ-
آئی ءَ گْوشتگ کہ من سرجمیں پوج ءِ اداراھاں، ھاسکار ڈی جی ایم آئی ڈی جی آئی ایس آئی ءُ آرمی چیف ءَ گوں دزبندی کن آں کہ منی برات ءَ یل بہ کن اِت ءُ مارا اے دْراجکشیں گم ءُ رنجاں چہ بہ رکین اِت-