دو برات مھمد اسماعیل ءُ محمد عباس ءِ کھول ءَ گوشتگ ھپت روچ پیسر شیشہ داگر کلات ءَ گوں پاکستانی لشکر ءَ دروگیں دیم پہ دیمی میڑ ءَ کُشگ بیتگ اَنت – کھول ءَ گْوشتگ کہ پاکستانی لشکر ءَ یک بج ءَ لوگ ءِ سر ءَ اُرش کتگ ءُ دوئیں ورنا چہ لوگ ءَ زرت ءُ چہ لوگ ءَ کمو دوری ءَ کشتگ ءُ چگل داتگ انت۔
بیران بوتگیں مردمانی پت عبدالغنی فالج ءِ نادراہ اِنت۔
آیانی مات ءَ گُشتگ کہ یک بج ءَ لھتے مردم وردی پوشیں مئے لوگ ءِ بام ءَ چِست بوتگ اَنت۔ من ءُ منی چُک وپتگ بیتگ انت اول ءَ مئے لوگ ءَ دستی بمبے چگل دیگ بیتگ ءُ پد ءَ تیر گواری بندات کنگ بیتگ۔
آئی ءَ گْوشت کہ لھتیں دمان ءَ پد منی دو چُک ، مھمد اسماعیل کہ بیست سال ءِ اُمر ءَ اَت ، آ ھم نادراھی یے ءِ آماچ اَت ءُ اگاں آئی ءَ سُھب ءَ گولی یے ھم نہ وارتگ اَت گُڑا سرجمیں روچ ءَ فالج بیت ، ءُ دگہ چُکے مھمد عباس کہ یک 17 سالی یے کہ چہ سھب ءَ بگر داں شپ ءَ وتی پت ءِ دوا ءِ زرّاں دیگ ءِ ھاتر ءَ کِشت ءُ کِشار ءَ کار کنگ ءَ ات، زوراکی ءَ برگ بوتگ انت-
آیانی مات ءَ گْوشت کہ من پوج ءِ کارمندانی پاد گپتگ اَنت ءُ گْوشتگ اگاں منی چُکاں کارے کُتگ گُڑا ایشاں تھانہ ءَ بَر اِت ءُ آمیدگس ءَ پیش بِہ کن اِت اگاں سابت بوت گُڑا منی دیم ءَ بہ کُش اِت ئے بلے زوراکاں منی چُکّاناں کُشت اَنت چہ جھول ءَ زُرت ءُ کمو دور ءَ بُرت ءُ دور دات اَنت۔
آئی ءِ مات ءَ گْوشتگ کہ آئی ءِ برگ ءَ چہ کمو دیر ءَ پد وھدے آئی ءَ تیر گواری ءِ توار اشکت ءُ چہ لوگ ءَ کمیں دوری ءَ یک ویرانیں دمگے ءَ شُت گڑا آئی ءِ دوئیں جگر تیراں چہ ٹُکّر ٹُکّر بوتگ اَنت ءُ پاکستانی لشکر ءَ آئی ءَ را یلہ داتگ اَت۔
مات ءَ گْوشت کہ وتی دوئیں کسان سالیں چُکانی لاشانی گندگ ءَ پد من کوکار کُت بلے کس نیست اَت کہ منی گریوگاں بہ اِشکُنت ءُ ناں کہ زالمیں مردماں جُست بہ کنت کہ شما اے گریبیں چُکاں بے ھچ سبوت ءَ پرچا کُشتگ اَنت۔
سیاداں گْوشتگ کہ ما چہ نیرواں دزبندی کتگ کہ آیاں دزگیر بہ کن اِت ءُ اگاں ھچ وڑیں ردی یے ءِ تہ ءَ ھوار بہ اَنت آیاں تھانہ ءَ بہ بارت بلے آیاں مئے چُک مئے دیم ءَ کُشتگ اَنت ءُ مکابلہ ءِ توار اِش کُتگ۔
یات بہ بیت کہ پاکستانی لشکر ءَ کلات ءِ ضلع ءَ آپریشن کنگ ءِ وھد ءَ دو مردم کشگ ءِ ٹاہ داتگ-
پاک اُرد ءِ جارکش آئی ایس پی آر ءَ گشتگ ات کہ قلات ءَ ملزمانی ھست بوگ ءِ ھال ءِ سر ءَ فورسز ءَ 6 ءُ 7 ستمبر ءِ شپ ءَ آپریشن کتگ ۔
آئی ایس پی آر ءِ ٹاہ ءِ رد ءَ تیرگواری ءِ شدیدیں تبادلہ ءَ پد 2 ملزم بیران بوتگ انت۔