بلوچستان لبریشن فرنٹ ءِ جارکش میجر گوھرام بلوچ ءَ شنگ کتگیں درشان ءَ گوشتگ سرمچاراں کیچ ءُ پنجگور ءَ دو جتائیں اُرشاں زورگریں لشکر ءُ پولیس لشکر نشانگ کرتگ اَنت۔
جارکش گوھرام بلوچ ءَ گوشتگ 9 ستمبر ءِ شپ ءَ ھشت ءُ نیم ءِ نزیک ءَ سرمچاراں کیچ ءِ ھند گورکوپ ءَ زورگریں لشکر ءِ مزنیں بنجل ءِ سر ءَ باز اے ون ءِ گولا آس داتگ کہ بنجل ءِ تہ ءَ کپتگ اَنت۔ ایشی پد سرمچاراں گوں نوک ءُ مزنیں سلاھاں بنجل نشانگ کرتگ چہ ایشی ءَ دژمنیں لشکر ءَ بازیں کچے ءَ جانی ءُ مالی تاوان بوتگ۔
جارکش ءَ گوشتگ دگہ یک اُرشے ءَ پنجگور چتکان ءَ سرمچاراں 8 ستمبر یک شمبے ءِ روچ ءَ پولیس ءِ گاڑی ءِ سر ءَ اُرش کرتگ، ایشی زد ءَ آھگ ءَ پولیس انسپکٹر شکیل اھمد مرتگ۔
گوھرام بلوچ ءَ گوشتگ بلوچستان بلوچ راج ءِ سرڈگار اِنت ءُ سرڈگار ءِ ھکی ئیں پسگاں سرڈگار ءِ سر ءَ پاکستانی زورگپتی ءِ بگیری ءَ سلاہ بندیں گھگیری ءِ پارست ءَ پاکستانی لشکر گوں زھنی، جانی ءُ سسائی پروش ءَ دیم پہ دیم کرتگ۔ چہ ایشی سوب ءَ پروش وارتگیں لشکر لس آبادی ءُ کودکیں مردماں نشانگ کنت۔
بی ایل ایف ءِ جارکش میجر گوھرام بلوچ ءَ گوشتگ پولیس ءَ کڈن کن ایں کہ آ سرمچارانی رندگیری کنگ ءَ یل بہ کنت اگاں نہ آسر ئِے دژمنیں لشکر ءِ وڑ ءَ بیت۔
جارکش ءَ گوشتگ بی ایل ایف اے دوئیں اُرشانی زمہ واری ءَ من ایت، داں بلوچستان ءِ آجوئی ءَ اُرش کنگ ءِ کول ءَ کن ایں۔