زھرشانی کنوکاں کالج ءَ کلاس ءُ ٹیچنگ ھسپتال تربت او پی ڈی ءَ یکگور داران ءَ زھرشانی نندانک داتگ-
ینگ ڈاکٹرز ایسوسی ایشن ءُ پیرامیڈیکل ایسوسی ایشن ءِ کمک ءَ ٹیچنگ ھسپتال تربت مکران میڈیکل کالج تربت ءِ فیکلٹی بسکاں پگارانی بندش ءِ ھلاپ ءَ زھرشانی بنجل ءَ مروچی سیمی روچ ءَ ایم ایس ءِ کارگس ءِ دیم ءَ برجاہ اِنت-
ھمے وھد ءَ ینگ ڈاکٹر ءُ پیرامیڈیکل ایسوسیشن مکران میڈیکل کالج تربت ءَ کلاسزانی نہ گرگ ءَ ٹیچنگ ھسپتال تربت ءِ او پی ڈی بند کتگ-
ھمے وھد ءَ جتا جتائیں سیاسی پاٹی ءُ چاگردی مھلوک زھرشانی نندانک جاہ ءَ اتکگ ءُ ھمدردی ایش درشان کتگ-
زھرشانی کنوکاں گوشتگ مکران میڈیکل کالج ءَ ھوار بلوچستان ءِ سَے ئے میڈیکل کالجزانی استاداں گوستگیں چار ماھاں پگاراں زبھر اَنت ءُ سرکار ءُ مھکہ ءِ سھت ءِ نادلگوشی ءَ استاد ءُ ڈاکٹر زھرشانی کنگ ءَ اَنت-
ڈاکٹراں گوشتگ اے گرانھادی ءَ گوستگیں چار ماھاں پگارانی بندش ءِ سبب ءَ مارا زھرشانی کنگ ءَ لاچار کتگ – اگاں انتزامیہ ءُ واکداراں مئے لوٹ سرجم نہ کت اَنت گڑا زھرشانی ترند کنگ بیت اِنت ءُ دراھیں زمہ واری سرکار ءُ مھکمہ ءِ سھت ءَ بیت اِنت-
زھرشانی کنوکاں گوشتگ بلوچستان ءِ سَے ئے میڈیکل کالج کہ چریشانی توک ءَ مکران میڈیکل کالج، جھالاوان میڈیکل کالج ءُ لورالائی میڈیکل کالج ھوار اَنت کہ استاد ےأ فیکلٹی باسکانی چار ماہ ءَ پگار بند اِنت ءُ میڈیکل کالجانی آسراتی نہ بوگ ءِ برابری انت-