شھزاد اھمد پاکستانی پوج ءَ آوار جتگ ءُ برتگ ءُ آ دیم ءَ آرگ ءُ یل کنگ بہ بیت اِنت- کھول
گیشیں اھوالانی چہ ھاران ءَ پاکستانی پوج ءِ دست ءَ بیگواہ کنگ بیتگیں شھزاد اھمد ء مھبوب ملازئی ءِ یل نہ کنگ ءِ ھلاپ ءَ کھول ءِ نیمگ ءَ زھرشانی روانکے کشگ بیتگ-
زھرشانی کنوکاں ھاران چیپ چوک ءَ روانک بندات کتگ ءُ شھر ءِ جتا جتائیً جاھاں تران ءُ آیانی دستاں پلے کارڈز بیتگ اَنت-
ھاران ءِ زھرشانی کنوکاں گوشتگ ھمے ماہ ءِ ھبدہ اگست ءَ پاکستانی پوج ءَ ورنائیں شھزاد اھمد دزگیر کتگ ءُ گون وت برتگ ءُ بازیں روچانی گوزگ ءَ پد ھم آ دیم ءَ آرگ نہ بیتگ شھزاد ءَ ھوار دگہ بیگواھیں مردم یل کنگ ءُ دیم ءَ آرگ بہ بنت-
زھرشانی کنوکاں سیکورٹی کارمند ءُ واکداراں لوٹ کتگ کہ اگاں شھزاد ءَ جرمے ھست گڑا آ دیم ءَ آرگ ءُ آمیدگس ءَ پیش کنگ بہ بیت اِنت-
زھرشانی کنوکاں گوشتگ ھپتگانی گوزگ ءَ پد ھم کھول سرپد کنگ نہ بیتگ نانکہ دگہ اھوال دیگ بوگ ءَ اَنت اگاں شھزاد یل نہ بوت گڑا کھول ءِ گون ءَ ھوار بہ این ترندیں زھرشانی کن این ایشی ءِ زمہ واری انتزامیہ بیت اِنت-
ھمے وھد ءَ زھرشانی کنوکاں ھاران ءَ ھوار بلوچستان ءِ دگہ جاھاں زورانسری آوار جنی ءِ آماچیں مردمانی یل کنگ ءِ لوٹ اش کتگ-