ماھل: بلوچ راجدپتر ءِ نوکازوک
نبشتہ کار :نوبت بلوچ
دی بلوچستان پوسٹ
انچوشکہ ما باز براں آشوب ءِ بابت ءَ اشکنیں یا کہ دنیا ءِ سوبمندیں آشوباں بگر دانکہ بے سوب ءُ ناکامیں آشوبانی ماڈل ءَ چار ایں گڑا آشوب ءِ لبز ءِ جند اکیڈمیاں تران ءُ مانا ءِ ھساب ءَ یک ڈول نہ اِنت۔ بزاں کہ آشوب جتائیں زانتکار ءُ نبشتکاراں ھما دَمگ ءِ ھساب ءَ آشوب ءِ مانا گیش ءُ گیوار کتگ۔ نوں اے گپ یات دارگی اِنت کہ آشوب ءِ مانا ءُ ماڈل المی نہ اِنت ھمے کہ 1979 ءِ کمیون آشوب بہ بیت یا روس ءِ اکتوبر آشوب بہ بیت گڑا ما گندیں ھر کجا آشوب ءِ مانا ءُ آشوب ماڈل یا ترزکار جتا جتا گندگ بنت۔
آشوب ماڈرن دنیا ءِ گالبند ءُ رواجے نہ ات بلکیں اے گالبند ءِ بابت ءَ کلاسیک پلاسپراں بگر دانکہ ھستیں وھد ءَ مزن مزنیں تھیورسٹانی لیکہ ءُ تران گندگ بنت۔
یونان ءِ شھزانت اپلاتون ھما مردم اِنت کہ آئی ءَ آشوب ءِ مانا ءِ گیش ءُ گیواری ءِ بنداتی مردماں چہ یکے۔ اگاں ما آشوب ءِ مانا ءَ ماں بُندپتر ءَ چار ءُ تپاس بہ کنیں گڑا اپلاتون ءِ رد ءَ آشوب ھما جاہ ءَ وجود ءَ کیت وھدے اِدارہ؛ بِزاں چرچ ءُ اِستان، راجمان ءِ تہ ءَ Value ءُ کوڈ آپ اتیکس ءِ آرگ ءَ سرجم ءَ بے سوب بہ بنت۔ دیمتر ءَ اپلاتون آشوب ءَ را یکشلیں اَمل ءِ نام دنت۔
چوشکہ یکشلیں اَمل ءُ مھکمیں Code of beliefs آشوب ءَ را دار اَنت۔ اپلاتون ءِ گور ءَ یک آسودگیں راجمانے ءِ تہ ءَ کہ اُود ءَ راجمان ءِ دود، رسم ءُ رواج مھکمی ءَ گوں پھازگ بہ بنت گُڑا اُود ءَ آشوب نئیت۔ کدیم یونان ءُ روم ءَ آشوب ءِ مانا سیاسی نزام ءِ اندر ءَ مٹی آرگ بُوتگ۔ بزانکہ اگاں بادشاھت نزام بوتگ گڑا بادشاھت ءِ سر ءَ سوال چست کنگ بوتگ، گڑا بادشاھی نزام ءِ تہ ءَ بدلی گوں ھاکم ءِ مٹ بوگ ءَ بندوک بوتگ بلے نزام ھما یکیں بوتگ۔
ھمے داب ءَ وھدے ما یونانی پلاسپر اپلاتون ءَ بگر دانکہ پولی بیس ءِ لیکہ ءَ چار ایں گڑا آیانی نز ءَ آشوب سیاسی نزام ءِ گِردانکے (سَرکولیشنے) ءَ را گُشگ بوتگ۔ بلے پرانسی آشوب ءَ پد آشوب ءِ مانا ءِ اندر ءَ مزنیں بدلی گندگ ءَ کیت۔ نوں آشوب ءِ مانا تھنا یکشلیں اَملے ءِ گِردانک نہ انت بلکیں اے بُندپتری اَملے ءِ رنگ ءَ ھم چارگ بیت، بزاں ھما جاور کہ آئی ءَ بندپتر ءِ اندرءَ مزنیں مٹی آورتگ گڑا آئی ءَ را ھم آشوب گُش اَنت، یا کہ کانودی مٹی، بیپاری ءُ راجمانی بدلی ھم آشوب گُشگ بیت۔ آشوب ھستیں نزام ءِ مٹینگ اِنت ھما نزام کہ پُرسودگ اِنت یا ھما نزام دگہ زورگیرے ءَ آورتگ ءُ تئی سر ءَ مُشتگ۔
یک گپے یات دارگ بہ بیت کہ آشوب ءِ لس مانا ھمیش اِنت کہ ھستیں نزام ءِ ولگوج کنگ یک دگہ نوکیں نزامے ءِ آرگ، بلے اے مانا ھر آشوب ءُ ھر زمینی راستیانی ھساب ءَ دپ نہ وارت۔
پرچا کہ وھدے ما بلوچ آشوب ءِ نز ءَ کہ چار ایں گڑا اد ءَ مانا اِیش نہ اِنت کہ ھستیں نزام ءِ پروشگ ءُ نوکیں نزام ءِ آرگ بلکیں بلوچ ءِ گور ءَ آشوب ءِ مانا دوبر وتی سرڈگار ءِ گرگ ءُ وتی مھرگڑھ دودمان ءِ دوبر بھالی اِنت بزانکہ وتی گوست ءِ نزام ءَ را دوبر بھال کنگ اِنت پرچا کہ بلوچ سرپد بیت کہ مھرگڑھ ھما دودمان اِنت کہ دنیا ءَ نوکیں اِلم ءُ زانتانی بارو ءَ آگاھی داتگ۔ آ اِلم توری کشت ءُ کشاری ءِ بابت ءَ بہ بنت یا کہ سائنسی اِلم بہ بنت گڑا اے درستیں دروت مارا مھڑگرھ دودمان ءَ گندگ ءَ کاینت پمیشکا بازیں زانتکارانی ھیال ھمیش اِنت کہ مھرگڑھ کلیں جھان ءِ دودمانانی امام اِنت۔
بلوچ آشوب ملٹری سنٹرک اِنت۔ دنیا ءِ مزن مزنیں آشوب ملٹری سنٹرک نہ بوتگ بلکیں سیاسی سنٹرک بوتگ بلے اے ھم اژدری ئیں شے نہ اِنت پرچا آشوب ءِ سلاھبندیں جھد ءِ بنجاہ ھم سیاسی لوٹ ءُ گزراں گوں بندوک اِنت۔ وھدے کہ ما بلوچ ءِ ملٹری سنٹرک بوگبءِ پژدر ءَ بندپتر ءَ چار ایں گڑا مارا پانزدھمی کرن ءَ چاکری دور ءَ ھم گندگ ءَ کیت اِنت کہ وھدے چاکر گوں لشکر ءَ دھلی ءِ تھت ءُ تاراج کنگ ءَ روت اِنت گڑا بانڑی شھیک ھم جنگ ءَ ھوار بیت۔ بلوچ ءِ راجمان ءَ ھچ پیمیں مارا جنسی پرک ءُ پیر گندگ نَیت بلے زورگیر ءَ بلوچ ءِ راجمان انچیں گڑ ءُ منجانی آماچ کرتگ کہ بازیں جاھاں مارا اے پرک پیداک کنگ ءِ جھد کنگ بیت۔ چوشکہ آئی ءِ ٹریپ ہاؤس بزانکہ مزن شھدربرجاہ ءُ مذھبی اسکولنگ ءِ سبب ءَ پیداک بوتگ۔
بلے بلوچ جنز ءِ بندات ءَ ما گند ایں کہ اولی رند بیت کہ بلوچ سیاست ءَ لمہء وتن کریمہ بلوچ ءِ دیم ءَ آیگ ءَ گوں بلوچ سیاست ءَ کم کم ءَ زالبول بھر زور بنت کہ مروچی مزنیں کچے ءَ سیاستبءِ بھر اَنت ۔ دومی نیمگ ءَ کالونیل ڈسکورس ءِ پروشگ ءَ زالبولاں پہ سلاھبندیں گل ءَ ھوار کنگءَ گوں مروچی بلوچ راجمان وتی آجوئی دوبر گرگ ءِ اَمل ءَ وتی دوبر دود ءُ ربیدگ ءَ ھم گرگ ءَ اِنت گوں ھما دود ءُ ربیدگ کہ اود ءَ جنسی پرک ءُ پیر نیست۔
بلوچ جنز وتی راجدپتر ءِ نوکازگ ءِ اَملے کہ اے نوکازگ ءَ یک نیمگے ھما سنڈیمن نزام کہ انگریزاں کبائل ءُ سردارانی وسیلہ ءَ داشتگ ءُ پد ءَ ھما نزام سیاھیں انگریز بزاں پنجاپی ءَ یکشلءَ برجاہ داشتگ گڑا اے جنز ھمے نزامءَ را ھم ولگوج کنانبءَ نوکازان اِنت۔ بلے ھستیں آشوب ءِ تہ ءَ زالبولانی گْورمے کہ پیداک اِنت گڑا اے وت پر سودگ ءُ مذھبی یا سنڈیمن نزام ءِ ھمک شے ءُ رھبنداں ولگوج کنان اِنت۔ 25 ءُ 26 اگست ءِ جندندری ارش ءِ تہ ءَ یک مزنیں نوکی اے گندگ بوت کہ ماھل بلوچ پنام زلان کرد نامیں جنکے جنگ ءِ لیڈینگ پرنٹ ءَ اولی ارش کنوک بیت۔ ماھل بلوچ ماں تربت مزن شہدربرجاہ ءَ کانود ءِ نودربرے بیت۔ آشوبی لبزانک ءَ گوں آئی ءِ مزنیں ھمگرنچی بیت بلکیں آ یک چو ایدگہ نودربرانی پیم ءَ کورس اورینٹڈ مردمے نہ بیت آئیبءِ ھب ءُ ھدوکی گوں وتی بندپتر ءُ آشوبی لبزانک ءَ گوں بندوک اِنت۔ ماھل بلوچ نَیکہ زورگیربءِ ٹریپ ھاؤس ءِ دام ءَ کپتگیں جنکے ات بہ گُپت ء فینن زورگیر ءِ وانگی ادارہ ٹریپ ہاؤس اَنت کہ اد ءَ نودربر وتی اسلیں کا زءَ چہ ٹریپ کنگ بنت۔ انچوشکہ تربت مزن شھدربرجاہ ءِ جاور انچوش اَنت کہ اے چاگرد سرجم ءَ بلوچ دود ءُ ربیدگانی چپ اَنت بلکیں یک انٹرکلچرے۔ اے ھما پنجابی ءِ آورتگیں ربیدگ اِنت کہ وش وشءَ ٹریپ ھاؤسانی وسیلہ ءَ بلوچ ءِ ربیدگ ءَ ولگوج کنگبءَ اَنت۔
تربت مزن شہدربرجاہ ءَ انچیں اشک ءُ آشکی چاگردے ٹھینگ بوتگ کہ مروچی ھر کس یار ءُ دزگوھاری ءِ پشت ءَ وتی گلامی ءِ نادراھی ءَ ھم مارگءَ نہ اَنت بلکیں بے ھس ءُ بے سمائیں مردم جوڑ کنگ بوگبءَ اَنت بلے دومی دیم ءَ ماھل بلوچ اِنت کہ آ پہ ھک ءُ راستیں راہبءِ نیمگ ءَ بران ات۔ اے ھما اُمر اِنت کہ گیشتریں جنک سُرکی ءُ پناں گلائیش اَنت وتی سَھت ءُ سینگار ءَ گوں دزگٹ اَنت وتی یار ءُ بچکداری ءَ گوں ملمہ اَنت بلے ھمے میان ءَ انچیں جنکے کہ وتی سَھت ءُ سینگار ءُ بوہ ءُ بُسانی جنگبءَ گیش وتی راجی گلامی ءِ ھلاپبءَ جندندریبءَ ساجو بیت ءُ 25 ءَ ازیمیں راہ ءِ نیمگ ءَ در کیت ءُ ریاست ءِ بنپداں ولگوج کنت۔ ھما نزام ءَ ولگوج کنت کہ آئی ءَ کبائلانی دروشم ءَ داشتگ آئی ءَ مذھب ءِ نام ءَ داشتگ اَنت یا آئی ءَ زبان ءِ بنیاد ءَ داشتگ اَنت یا کہ آئی ءَ وتی ٹریپ ھاؤسانی وسیلہ ءَ یکوئی برجمینتگ۔ اے اَمل ھمے درستیں چیزانی پروش اِنت کہ ماھل ءَ یکبرے پد ءَ بلوچ دودمان بلوچ راجدپتر دوبر نوکاز ات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی اِنت-