بلوچ یکجھتی کمیٹی ءِ جارکش ءَ گوشتگ بلوچستان ءَ ژانگول کتگیں لاشانی دور دیگ ءِ درچ ءَ گیشی آرگ بیتگ – بلوچستان ءِ جتاجتائیں جاھان بازیں لاش دزکپتگ اَنت کہ ایشانی توک ءَ چار لاشانی پجار فیاض جتک،نثار اھمد زھری، نعیم اھمد ءُ سعید اھمد ھوار اَنت ءُ ایشاں ابید دگہ لاشانی پجار نہ بیتگ اَنت-
آئی ءَ گوشتگ بلوچستان ءَ یک رندے پد ءَ زُلم، زوراکی ءُ رستری ءِ توک ءَ گیشی آرگ بیتگ – ریاست بلوچ نسل کشی ءِ پالیسی ءَ ھچ رنگ ءَ ھلاس کنگ ءَ تیار نہ انت – ریاست ءِ زوراکی ءِ دروشم پدر بیتگ کہ ریاست بلوچستان ءَ تاکت ءُ زوراکی ءِ سر ءَ ستک دار ایت اے پالیسی ءَ بلوچستان ءَ انسانی ھلاسی ءِ ترسے ودی بیتگ کہ اود ءَ یکین روچ ءَ بازیں ورنا کُشگ ءُ چگل دیگ بیتگ اَنت-
جارکش ءَ گوشتگ ما انسانی ھکانی گلاں گوں دزبندی کن این بلوچستان ءَ انسانی ھکانی سنگینیں لگمتالی ءِ سر ءَ گامگیج بہ زیر ایت- ریاست پاکستان ءِ زوراکیانی پالیسیانی سبب ءَ بلوچستان ءَ لکانی مھلوک ءِ زندمان ءِ واستا ترس اِنت-