بے تواری ءَ سر چِست بنت
نبشتہ کار: ایم آر بلوچ
دی بلوچستان پوسٹ
آ مُدام بے توار اَت آ مُدام پِکر ءُ ھیالانی تہ ءَ ملور اَت ءُ آ یک شْوانگے اَت مدام سُھب ءَ لَٹّے زُرت ءُ دیم پہ کوہ ءَ بُزانی چارینگ ءَ شت. اے شونگ ءَ گوں بے تواری ءَ سکین ھاموشی ءَ یک کوھے ءِ کِر ءَ ءُ درچکے ءِ بُن ءَ وپت۔ گڑا آئی ءَ دل ءِ تہ ءَ یک بلاھیں پِکرے ھست اَت آئی ءَ کس ءَ گوں ھچ نہ گْوشت آئی ءَ بے تواری ءَ دراھیں میتگ ءِ مَردم ھبّکہ اَت اَنت ھر کس ءَ ھمے ھبر جیڑ اِت ءُ گْوشت کہ اے گنوک اِنت ءُ سارین مَردم چون گُپ ءُ تران نہ کنت ؟
آئی ءَ گپ ھچبر نہ جت وھدے آئی ءَ گپ کُت آئی ءِ گپانی سر ءَ مُردمان بیم اتک آئی ءِ گپ ءُ ھبر چہ زانتکارانی ھبران شوکتر اِت اَنت-
آئی بے تواری ءَ ءِ تھا یک ترسے است اَت آ چہ زانت ءِ دنیا ءَ چہ دْراھیں مردمان کمتر اَت ءُ اے ھم یک جوانین گپے اَت کہ ایشی ءَ گوں تھنائی ءَ بے کساس مھر اَت ءُ آ مُدام ایوک اَت ءُ گوں وتی جیڑگان گار اَت گڑا یک روچے من چہ آئی ءَ جُست کُت تو چیا ملور ملور ئے ؟ تو چیا زند ءِ گمانی تہ ءَ گار ئے؟ تو چیا بے توار ئے ؟ من آئی ءَ گوں اولی رند ءَ گپ ءَ اِت آں. آئی ءَ درائینت کہ من یک انسانے نہ آں ءُ آ گوں اے گپ ءِ ھواری ءَ پاد اتک وتی لوگ ءِ نیمگ ءَ رھادگ بوت آ شپ ءَ گور ءُ گاراں دُرائیں میتگ سرا زُرتگ اَت.من چہ لوگ ءَ دراتک آں ءُ چار اِت لیٹ بزّگیں شوْانگ ءِ گِس ءِ دیم ءَ اِنت ۔ من لپرزگ ءَ لگّ اِت آں ءُ جیڑ اِت اِے چونیں لیٹ اَنت؟ ۔ من چَہ تُرس ءَ لوگ ءَ شُت آں ءُ تُرس ءَ منی واب پچ گپتگ اَت۔
ھردے روچ بوت ءُ من چَہ گِس ءَ دراتک آں ءُ دیت داں شوانگ ءِ پس ءِ چمّ ھرس اِت اَنت۔ من چَہ شوانگ ءِ پت ءَ جُست گپت ناکو! دوشیگیں لیٹ چونیں بوتگ اَنت ؟ آئی ءَ گوں ھرسیگیں چمّاں پسو دات کِہ ھُدا بزانت دوشی لھتیں گاڑی والا اَتکگ ءُ منی چُک ئِے بُرتگ۔ من پَہ ھیرانی ءَ گْوشت ناکو تئی چُک وَ ھاموشیں چُکے بوتگ ۔آئی ءَ پَہ گریوگ گْوشت بے تواری ءَ سر چست بنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-