بلوچستان ءَ بمب تراکاں چہ جکیستگ ، پاکستانی پوج سر ءَ بازیں اُرشے کنگ بیتگ

بلوچستان ءِ بازیں دمگاں تیرگواری ءُ بمب تراکانی بازیں ھالے نکش کنگ بوتگ-

گیشیں ھالانی رِد ءَ بلوچستان ءِ دمگ سبی شھر ءِ نامی ئیں شھدگ نشتر دگ ترین چوک سر ءَ ناشناسیں سلاہ بندیں پرپٹ سواریں پٹ پول ءَ دلگوشیں پولیس کارمندانی سر ءَ دستی بم بے چگل داتگ ءُ تتکگ اَنت-

تراک ءَ پولیس کارمندانی نزیک ءَ بیتگ چریشی ءِ آسر ءَ بازیں کارمندے ءِ ٹپی بیگ ھال اِنت، وھدے کہ پولیس ءُ پاکستانی پوج ءَ دمگ انگر ءَ کتگ-

دومی نیمگ ءَ بلوچستان ءِ دمگ تربت شھر ءُ بلیدہ ءَ بازیں تراکانی ءُ تُرندیں تیرگواری ءِ ھال اِنت وھدے کہ بلوچستان ءِ دمگ ھُزدار ءَ ھم بمب تراک ءِ ھال اِنت-

چہ تربت ءَ دزکپتگیں ھالانی رِد ءَ ناشناسیں مردماں یکیں وھد ءَ جتاجتائیں پاکستانی پوج بُنجلانی سر ءَ راکٹ اُرشاں نشانگ کتگ اَنت-

ھمے وڑ چہ گوادر ءَ ھال اِنت دیمی زر ءَ ناشناسیں مردماں پاکستانی کوسٹ گارڈ گرنیڈ اُرش ءَ نشانگ کتگ اَنت چریشی ءِ آسر ءَ پاکستانی کوسٹ گارڈ کارمنداں جانی ءُ مالی تاوان ءِ ھال اِنت-

بلوچستان ءِ دمگ مستونگ ءَ بائی پاس نزیک ءَ ناشناسیں مردماں دو جتاجتائیں ھندانی سر ءَ شورو ایر کتگ ریل ٹریک تراک ءَ گوں تباہ کتگ اَنت چریشی ءَ چہ شال ءَ آؤکیں ءُ رؤکیں ٹریک ءَ تاوان رس اِتگ-

مستونگ کھڈکوچہ ھند سر ءَ ناشناسیں مردماں لیویز تھانہ سر ءَ تیرگواری کتگ چریشی ءَ پد پولیس ءُ ایف سی ءِ مزنیں کچے ءَ وئیلجاہ ءَ نیمگ ءَ شتگ اَنت، گیشیں ھالانی آیگ پش کپتگ-

ھمے وڑ بلوچستان ءِ بُنجاھی شھر شال کچی بیک پولیس اسٹیشن سر ءَ دستی بمب اُرشے بوتگ، بازیں کارمندے ءِ ٹپی بیتگ اَنت-

ھمے وڑ کلات ٹول پلازے سلاہ بندیں مردماں دستیگ کتگ، ٹول پلازہ نزیک ءَ پُھل تراکناکیں شورواں تباہ کتگ اَنت-

کلات مھلبی ھند سر ءَ ھم پٹ پول کتگ، لیویز کارمند ءُ گوں سلاھاں برتگ اَنت-

ھمے وڑ نوشکی تفتان بُنجاھی شھدگ سر ءَ سلاہ بندیں مردمانی پٹ پول برجاہ ءَ اِنت لیویز کارمندانی دزگیر کنگ ھال اِنت-

دومی نیمگ ءَ بیلہ ءَ تُرندیں تراک ءِ توار اش کنگ بیتگ ءُ یکشل ءَ تیرگواری ءِ رِد برجاہ ءَ اِنت-