بلوچ ءِ مُھکمیں زبان ءُ آئی ءِ ربیدگ
نبشتہ کار: شَکّل بلوچ
دی بلوچستان پوسٹ
یک راجے ءِ مستریں پجّار گوں آئی ءِ زبان ءَ بندوک اِنت۔ بلوچی زبان بلوچ راج ءِ راجی زبان اِنت، بلوچ راج ءِ بُندریں زمین بلوچستان اِنت۔
وھدے کہ ھر دور ءُ باریگاں مدام دری راجاں بزاں زوراوراں بلوچستان ءِ سر ءَ ،زمین ءِ سر ءَ چمشانک داتگ، چوناھا بلوچستان دری زوراورانی نیمگ ءَ یک ارزشتے دار اِیت پہ لُٹ ءُ پل ءِ واست ءَ بازیں پندلاں پہ بلوچ راج ءِ سر ءَ سازینتگ۔
زوراور مدام اگاں یک نزوریں زمینے ءِ سر ءَ کبزہ ءِ نیت داشتگ گڑا درستاں چہ پیش زوراور ءَ نزوریں راج ءِ زبان، دود ءُ ربیدگ ءُ چاگرد رھبنداں پیسر ءَ وَ الم وان اِیت پرچا کہ ابید یک راجے ءِ زمین ءِ کبزہ کنگ ءَ بلوچ زندگیانی وانگ اژدری بیت، درستاں چہ پیش آ راج ءِ زندگی ءَ یکشل ءَ مٹ کنگ ءِ جُھد ءَ کن اَنت، آئی ءِ کوھنتریں راجدپتری مواداں ایر جنت کہ شما وَ بلاھیں جاھل اِت۔
شمئے زندگی وَ بے کار اِنت گڑا آ پندل سازی کن اَنت گیشاں گیش نزوریں راج ءِ ایردست کنگ ءَ پیسر ءَ آئی ءِ سر ءَ وتی ھساب ءَ وانگی رھبند ٹھین اَنت ءُ نزوریں راج ءِ سر ءَ مُش اَنت ئِے، آئی ءِ زبان ءَ جاھل گُش اَنت کہ چُشیں جاھلیں زبان ءِ وانگ ءَ شمارا ھچ سِیت ءُ پائدگ نہ رس اِیت۔
چہ ایشی ءَ پد میزان میزان ءَ آئی ءِ سر ءَ دری زبان ءِ وانگ ءَ ایردستیں راج ءِ زبان ءِ سر ءَ سک باز سان کپ اِیت، ءُ نیکہ تَھنا آئی ءِ زبان ءِ سر ءَ سان کپ اِیت بلکیں آئی ءِ پورائیں زندگانی ءِ سر ءَ سان دور دینت۔
بلوچ ءِ زبان ءِ گار کنگ ءَ زوراور ءِ بلاھیں دستے مان بیت ءُ پد ءَ آئی ءُ چاگرد رھنداں ولگوج کنگ ءَ دگہ ھم پندل سازی کن اَنت۔
ایشی ءِ مستریں مکسد زوراور ءِ ایش اِنت کہ ھما راج ءِ زمین ءِ سر ءَ وھدے کہ سامراج وتی چماں ایر کنت گڑا آ ایردستیں راج ءِ چُکچینی ءَ بندات کنت۔
بلوچ ءِ ماتی زبان وھدے کہ گار بیت، گڑا بزاں بلوچ گوں وتی زمین ءَ یکشل ءَ بے گواہ بیت۔ نوں باید اِنت بلوچ راج اے چیزاں سرپد ءُ پوہ بہ بنت کہ راجے کہ مان اِیت گڑا آئی ءِ زبان ءِ منّت ءَ مان اِیت۔
بلوچ ءِ راجدپتر چہ بُندر ءَ مُھکمیں، آئی ءَ وت ءَ یک مُھکمیں زمینے ھست، مُھکمیں وت ءَ زبان ھست ءُ دود ءُ ربیدگ ءَ ابید ھم یک مُھکمیں دودمانے ھست اِنت۔ نی باید اِنت کہ بلوچ وتی مُھکم کنگ ءَ تپاک بہ بیت ءُ چہ وتی ماتیں زمین ءَ زوراور ءِ دست ءَ بہ رکین اِیت۔ شالا بلوچ راج زندگ بات ، بلوچستان آجو بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-