27 جون 2024 ءَ ھاجی ڈاکٹر ابداللہ ءِ زھگ زھیر اھمد بلوچ کہ پاکستانی انٹیلی جنس ءُ سی ٹی ڈی ءَ چہ شال ءَ بیگواہ کتگ ءُ انگت ءَ یل نہ داتگ ئے۔
زانگ بہ بیت کہ زھیر اھمد ءِ جان سلامتی ءِ رکینگ ءِ ھاتر ءَ کھول ءِ مردمانی نیمگ ءَ چہ 15 روچ ءِ مُدامی زھرشانی ءَ پد سرکار، کھول ءِ مردم ءُ بی وائی سی ءِ میان ءَ ھبر بوتگ کہ زھیر اھمد ءِ جان سلامتی ءِ ھاتر ءَ کمیٹی یے جوڑ کنگ بوت کہ آ ھکومت ءِ مردماں، ھاندان ءِ مردماں ءُ بی وائی سی ءَ جوڑ بوتگ اَت۔
لوگ ءِ مردمانی گْوشگ اِنت کہ سرکاری کارندھانی نیمگ ءَ داتگیں 15روچی ڈیڈ لائن ءَ چہ یک ماھے گوزگ ءَ پد ھم ھچ وڑیں ھال ءُ اھوالے نہ بوتگ ءُ انگت ءَ زھیر اھمد بلوچ بیگواہ اِنت۔
آئی ءَ گْوشت کہ سرکاری کمیٹی ءِ باسک چکاسگ ءَ انت ءُ زھیر اھمد بلوچ ءِ رکّینگ ءِ واست ءَ دلگوش نہ انت نیکہ آیانی گور ءَ واک ءُ وس انت ءُ آ بس وھد ءِ زوال کنگ ءَ انت۔
آئی ءَ گْوشت کہ زھیر اھمد بلوچ ءِ جان سلامتی ءِ واست ءَ ھال ءِ نہ بوگ ءِ سبب ءَ سیاداں سوڑگ کتگ کہ آ زوت پریس کانفرنس ءِ وسیلگ ءَ وتی آیوکیں گامگیج ءِ جار ءَ جن انت ءُ امنیں زھرشانی ءِ ھمک وسیلہ ءَ کارمرز کن انت۔ چہ انسانی ھکانی گل ءُ سول سوسائٹی ءِ ھر وڑیں زانتکار ءُ پکر ءِ مردماں گوں دزبندی اِنت کہ پہ زهیر اھمد بلوچ ءِ جان سلامتی ءِ واست ءَ توار چِست بہ کن اَنت۔