بلوچستان ءَ بشی ھور، 19 مردم بیران لوگ کپتگ انت ءُ دگ پرشتگ انت

ترندیں ھور ءُ توپانی ھارانی سبب ءَ داں انگت ءَ بلوچستان ءِ بازیں جاھاں زمینی اھوال سستگ اَنت-

بلوچستان ءَ بشی ھورانی گوارگ ء درچ برجاہ انت بیست جولائی ءَ بندات بیتگیں ھوراں داں انگت ءَ نُھ زھگاں ھوات نوزدہ مردم بیران بیتگ انت ءُ یازدہ زدگ بیتگ اَنت ءُ چہ ھوراں کلات،جھل مگسی، زیارت ءُ سھبت پور سانمند بیتگ اَنت-

مولم شناس ءِ رد ءَ بلوچستان ءِ بازیں جاھاں مولم بشی گرم انت ءُ بلوچستان ءَ دومی زورمندیں بشی ھور بوگ ءِ گمان ھست انت-

مولم شناس ءِ رد ءَ مروچی ژوب،بارکھان، موسیٰ ھیل، شیرانی،لورالائی، سبی، زیارت، لسبیلہ، کلات، ھزدار ءُ نسیر آباد ءِ لھتے دمگاں ھورانی گمان انت – پی ڈی ایم ءِ رد ءَ گوستگیں بیست ءُ چار ادارانی توک ءَ کلات چِل ءُ ھشت ملی میٹر اوستہ مھمد بیست ءُ یک ملی میٹر ءُ شال ءَ دَہ ملی میٹر ریکارڈ کنگ بیتگ اَنت-

پی ڈی ایم ءِ رد ءَ بلوچستان ءَ توپانی ھارانی سبب ءَ دگہ سَے مردم بیران بیتگ اَنت ءُ چریشی ءَ پد بیست جولائی ءَ بندات بیتگیں توپانی ھار ءُ گروک ءِ سبب ءَ نُھ زھگاں ھوار نوزدہ مردم بیران بیتگ اَنت- ءُ بشی ھوراں دَہ زھگاں ھوار یازدہ مردم زدگ بیتگ اَنت-

ھمے وھد ءَ چار سد ءُ سِی ءُ چار لوگاں تاوان رس اتگ ءُ ایشانی توک ءَ یک سد ءُ بیست ءُ شش سرجم ءَ ڈرویتگ اَنت ءُ ھورانی سبب ءَ سَے ھزار ءُ سِی ءُ یک مردمانی لوگ ڈرویتگ اَنت-

ھورانی سبب ءَ جتا جتائیں جاھاں شش پھلاں تاوان رس اتگ ءُ گروک ءِ کپگ ءَ یک سد ءُ سِی ءُ یک دلوت مرتگ اَنت-

بشی ھورانی سبب ءَ نود ءُ ھپت ایکٹراں ھواریں کشار تباہ بیتگ اَنت ءُ سِی ءُ یک کلو میٹر دگ ءُ یک ھیلتھ یونٹے ءَ ھم تاوان بیتگ ءُ بیست جولائی ءَ بندات بیتگیں ھوراں داں انگت ءَ دوھزار ءُ نُھ سد ءُ نوزدہ مردم سانمند بیتگ اَنت ءُ نوشکی ءُ بیلہ ءُ توپانی ھارانی سبب ءَ بازیں میتگاں رھوتی اھوال سستگ ءُ کشاراں تاوان رس اتگ-