وائس فار بلوچ مسنگ پرسنز ءِ سروکی ءَ چہ بلوچستان ءَ زورانسری آوار جنی ءِ ھلاپ ءَ برجاھیں دراجکشیں شُدکُشیں ھڑتال ءِ گدان ءَ مروچی پنچ ھزار پنچ سد پنجاہ یک روچ سرجم بیتگ، وکیل گدان ءَ اَتکگ ءُ کھول ءَ چہ یکجاھی درشان اِتگ وھدے کہ بیگواھیں رئیس محمود ءِ کھول گدان ءَ اَتکگ ءُ وتی زھرشانی نکش کنائینتگ-
ھمے درگت ءَ تران کنان ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گْوشتگ کہ پاکستانی زورگر ءُ آئی ءِ چیریں ادارھاں کہ بلوچ پارلیمنٹ پرستانی کمک ءَ چہ بلوچ زرمبشت ءَ لپاشگ کنگ ءَ ھرچ وڑیں جُھد کنگ ءَ اِنت، بلوچ ورنایاں زورانسری آوار جنی ءِ میان ءَ آوار جنگ ءُ لَٹ کُٹ کنگ آیانی لاش ویرانگ ءَ دور داتگ اَنت کہ بلوچ ورنایانی دل ءِ تہ ءَ تُرس ودی بیتگ ءُ آ وتی منزل ءَ تاں سر بیگ ءَ زرمبشت ءَ دزکش بہ بنت بلے نو اے وڑ نہ بیت-
ماما قدیر بلوچ ءَ گْوشتگ اے اشانی ردی اِنت کہ کسے ءِ دیم ءَ تُپنگ ءَ چگل دے اَنت ءُ سیاسی جُھدکار شھیدانی ھون ءَ چہ دروھی کنگ ءُ زرمبشت ءَ دزکش بیت بلوچ زرمبشت ءِ سپاھیگ ھرچ پندلاں بے سوب بہ کنت کہ آیاں ھپتاد پنچ سالاں چہ سر ءَ کپن بستگ آیانی دیم پہ دیمی کنگ ءَ اَنت تچکیں سنگت ءُ آشک ءَ ھما مردم بلوچ شھیدانی گرانبھائیں دیمونی ءِ سبب ءَ چہ نو ھرچ بلوچ ءِ زھگ پاد اَتکگ نو ھرچ لوگ ءَ زرمبشت ءِ گپ بیگ ءَ اِنت-
ماما قدیر بلوچ ءَ اے درگت ءَ بیگواھیں محمود رئیس کھول ساڑی بیگ ءَ گْوشتگ کہ محمود رئیس پاکستانی پوج ءُ چیریں ادارھاں زورانسری بیگواہ کتگ چریشی ءِ سبب ءَ آئی ءِ کھول سسّایے گم ءُ رنج ءِ آماچ اَنت- ما میان استمانی ادارھاں چہ دزبندی کن ایں کہ آ محمود رئیس ءَ دیم آرگ ءِ وتی کرد ءَ پیلو بہ کن اَنت-