ڈاکٹر عبدالحئی بلوچ ءِ یل نہ کنگ ءِ ھلاپ ءَ شال ءَ کھول ءِ زھرشانی

زورانسری آوارجنی ءِ آماچین عبدالحئی ءِ یل نہ کنگ ءِ ھلاپ ءَ شال ءَ کھول ءَ زھرشانی ءُ روانک کش اتگ-

ڈاکٹر عبدالحئی ءِ کھول ءِ نیمگ ءَ سَے شمبے ءِ روچ ءَ بلوچستان یونیورسٹی ءَ چہ یک روانکے برجم دارگ بیتگ کہ جتا جتائیں دگاں تران ءُ پریس کلب ءَ سر بیتگ ءُ اود ءَ کھول ءَ وتی زھرشانی یاداشت کتگ –

ھمے وھد ءَ بیگواھیں ڈاکٹر عبدالحئی ءِ کھول ءِ ھمراھی ءَ دگہ بیگوابیں مردمانی کھولانی ھواری ءَ بازیں کچے ءَ شھری گندگ بیتگ انت ءُ بیگواھیں مردمانی اکس اش چست کتگ ءُ ایانی یل کنگ ءِ اوگام اش جتگ-

ھمے وھد ءَ روانک ءَ گپ کنان ءَ آواران ءِ جھمنندیں زورانسری آوار جنگ بیتگیں ڈاکٹر عبدالحئی بلوچ ءِ گوھار بکتاور ءَ گوشتگ منی برات ڈاکٹر عبدالحئی یک جون دوھزار ءُ بیست ءُ چار ءَ پوج ءَ دزگیر کنگ ءَ پد بیگواہ کتگ ءُ سَے ماہ ءِ گوزگ ءَ پد ھم ھچ اھوالے نیست اِنت-

بکتاور ءَ گوشتگ منی برات سرکاری ملازمے ءَ آ آواران ڈسٹرکٹ ھسپتال ءِ ٹی آپریٹنگ اسسٹنٹ بیتگ آ کلینک ءَ پاکستانی پوج ءَ آوار جتگ ءُ برتگ-

آئی ءَ چہ سرکار ءَ لوٹ کتگ کہ منی برات ءَ یل بہ کنت ءُ اگاں منی برات ءَ سزا ءُ جزائے ھست گڑا آ امیدگس ءَ پیش کنگ ءُ مارا تسلی دیگ بہ بیت اِنت-

زھرشانی ءَ ھواریں دگہ مردماں گوشتگ سرکار مئے بیگواھیں مردماں دیما بیار ایت ءُ یل بہ کنت –

آیاں گوشتگ سرکار ءِ نیمگ ءَ مارا مئے بیگواھیں مردمانی مٹ ءَ زر دیگ ءِ گپ جتگ اسل ءَ اے گپ مئے ٹپاں گیش کُدینگ انت –