زمین ءِ مھر ءُ سربلند
نبشتہ کار: همبل بلوچ
دی بلوچستان پوسٹ
بلوچستان ءِ ھاک ءَ چہ ودی بوتگیں سرمتابیں سربلند کہ واجہ انور ءِ لوگ ءَ ودی بوتگ کہ آئی ءَ وشکوشیں پروم ءِ ھاک ءَ وتی چم پچ کت انت ءُ وتی بُنکی وانگ ءُ زانگ چہ واجہ مھمود ھائی اسکول پروم ءَ بندات کرت دانکہ ۲ تبک ءَ ھمود ءَ ونت ئِے پد ءَ دیم پہ ملا اِزت ءِ شھر ءَ شُت پہ وانگ ءِ ھاتر ءَ من ءَ سال یات اِنت ۱۔۵۔ ۲۰۰۹ آئی ءَ دی اویس اسکول ءَ پد ءَ یک برے آئی ءَ وانگ چہ اولی کلاس ءَ داھِل ءَ دیگ بوت وتی وانگ ءُ زانگ پد ءَ دوبر بندات کت یاد بہ بیت کہ آئی ءَ وتی کسانیں سَند ءِ گیشتریں وھد پنجگور بواھز ھاسٹل ءَ گْوازینت دانکہ لھتیں سال ءَ سربلند کلاس ھمدا ھاسٹل ءَ گوازینت پد ءَ لوگ بوت گڑا دانکہ 8 کلاس دی آئی اویس ءَ ونت پد ءَ پہ گیش ءِ وانگ ءِ ھاتر ءَ شال ءَ شُت لھتیں ماہ پد چہ شال ءَ واتر اتک آئی ءِ ھیال ءُ سوچ پھک بدل بوت اَت، گْوش ئے آئی ءِ مجگ ءُ دِلانی تہ ءَ وتی زمین ءِ بزگی ءُ راج ءِ دِرتہ پُچی چوں اکسے ءَ نکش اَت ءُ آ اِے اکس ءَ کُلیں مردُماں پیشدارگ لوٹگ ءَ اَت کِہ زمین چون اِنت ءُ مارا پہ زمین ءَ الّم چیزے نا چیزے کنگی اِنت۔ آئی سنگت ءُ ھمراہ ھم بدل بوتگ اِت اَنت گوں نوکیں ءُ درچِتگیں ھمراھاں آئی ءَ وتی راج ءِ گُلامی ءَ مارگ ءَ اَت ءُ من جزم گْوشاں آ ساھتاں آ گوں وتی سنگتاں ھمے ھبر ءَ بوت کِہ مارا چے کنگی اِنت ءُ چونی ءَ مارا وتی زمین ءِ ھک پورا کنگی اِنت۔
سربُلند پگری سنگتانی توک ءَ لھتیں شھید بوت، لھتیں انگت کوہ ءَ انت، لھتیں پہ زند ءِ زاتی واھشتانی پُشت ءَ لگور بوت انت، ءُ لھتیں زندان ءَ بندیگ اَنت۔ ھمے دور ءُ باریگ ءَ وتی ھنکین ءَ واتر آتک گڑا سک گمیگ اَت تکانسر اَت وتی اندر ءَ جیڑگ ءَ اَتبرے یک گپے ءِ سر ءَ گپ کنگ ءَ اَت چیزانی شر کنگ ءِ جھد ءَ اَت انچو سما بوت کہ پورا چیزے ءِ اشک ءَ گور جتگ اَت یک ءُ دو سال نہ گوست سربلند ءَ وتی جند سر کت اِشک ءِ راھے گپت ءُ رُکست اِش کت مارا۔۔۔ بلے آئی ءِ چمانی تہ ءَ مدامی جُستانی گرنچ ءِ ھست اَت سربُلند ءَ جُوانیں بُنگپانی گوش دارگ ءِ سکیں شوکینے اَت آئی ءِ شوکتریں ھیل ھمیش اَت بس چیزانی بابت ءَ جُست ءُ پد کنگ اَت آئی ءَ مدام جُست کرت اسکول ءِ زمانگ ءَ وتی استاد ءَ را کہ جنگ چی یے؟ بلوچ پرچا جنگ کنگ ءَ انت ؟ گڑا سر ءَ پسّو نہ دات ءُ گُشت ئِے کہ ترا گوں بلوچ ءُ جنگ ءَ کار نیست ھرکسی وتی کار اَنت گڑا سربلند ءَ کندگے جت ءُ گشت کہ ترا میجر ءِ ۶۰۰۰۔ واکی وتی وڑا کتگ گڑا سر جزباتی بوت ءُ لٹ کٹ کت ءُ کلاس ءَ چہ کشّ اِت ئِے ءُ ھما روچ ءَ رند من پھم اِتگ اَت کِہ اے نہ تُرسی، اِے جورجوابی کِہ آئی ءِ توک ءَ ھست اَت اِے ھمے زمین ءِ مھر ءِ برورد اِت اَنت کِہ آئی ءَ را اِنچو توانگِر کُتگ اَت ئِے کِہ گوں وتی جُستاں آئی ءَ وتی دیم ءِ مردُم ھم نگیگ کُتگ اَت بلے وت بِھ نہ تُرس اِتگ اَت۔
من پد ءَ ھمدا ھیران بوت آں کہ بلند جان ءَ اے جُست چون مجگ ءَ آتک ءُ اِے امر ءَ چونیں چونیں جُست کنگ ءَ اَت ۔۔ من بلے نہ زانتگ اَت کہ آئی ءَ وتی زند ءِ راہ گچین کرتگ کہ من ءَ اے جُستانی پَسّہ کجا دست کپ اَنت ءُ من ءَ وتی زند ءِ شوک تریں ساھت کجا گوازینگی انت۔۔ بُلند جان ءِ دپ ءَ مدام پُرمھریں بچکندے ھست اَت ءُ سک مھروان اَت گوں جنگ ءَ آئی ءَ را بلاھیں مھرے ھست اَت اسل ءَ جنگ کس ءَ را وش نہ بیت کس پہ شوک جنگ نہ کنت آئی ءَ وتی زمین دیستگ اَت آئی ءَ وتی راج ءِ بزگی ءُ ایردستی دیستگ اَت نوں آئی ءَ بس ھمے گشتگ اَت کہ جنگ المی اِنت بازیں(جاوراں جیڑہ چوش بہ بنت کہ پیسر ءَ ھیل بکن ءُ پد ءَ اَمل بہ کن بہ گندئے پیسر ءَ اَمل کنگ بیت ءُ پد ءَ ھیل کنگ پرچا کہ اَمل وت زانشتی راھبند ءِ دومی نام انت )۔ گڑا من ھمے جیڑ اِتگ اَت کہ زمین ءِ چونیں مھرے کہ یک کسان سالیں ورنایے ءِ وتی زند ءِ زاتی واھشتاں نہ سرجم کنت ءُ وت ءَ را پہ زمین ءَ کولیگ کنت گُش اَنت کہ مھر تئی مھکم بہ بیت پہ تو زاتی زند نہ مان اِیت۔
مِھر انسان ءَ ھما سیمسراں بارت سر کنت کِہ آئی ءَ را ھِچّ چوشیں چُرتے نہ بیت کِہ وشّی، شادکامی، زِند، ءُ مرگ چی اَنت آ تھنا یکیں ھبر ءَ پوہ بیت کِہ چون وت ءَ را پہ ھما اشک ءِ راہ ءَ کولیگ بکنت ءُ بُلند جان ھمے داب ءَ اَت کِہ آئی ءَ پہ زمین وتی کسانیں بالاد ھم نہ چار اِت کِہ من انگت کساناں ءُ زمین تھنا منی نہ اِنت درستانی اِنت گڑا من چی ءَ ءُ پرچا وتی واھشتاں گُٹگیر بِہ کناں!! ھمے کمال اَت سربُلند ءِ کِہ آئی ءَ دِگرانی مِرَگ ءِ ودار نہ کُت ءُ پھر ئِے نہ بست کِہ پلان مردُم منی وتی بوتگ ءُ پہ زمین شیدا بوتگ بلکیں آئی ءَ وتی جِند نْدر کُت ءُ باور دیائینت مارا کِہ کُربانی چہ انسان ءِ جِند ءَ بِنا بیت ۔ شُما کربان مہ بَہ اِت من پہ شُما کُربان باں، واکی ھمے وڑ بوت۔ آئی ءَ وت ءَ کُربان کُت ءُ راجدپتراں نمیران بوت۔
داں بُرز ءَ استالے چم اِیت تو زِندگ ئے۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-