روکپتی بلوچستان ءَ یک بسے ءِ کپگ ءَ یازدہ مردم بیران بیتگ انت ءُ ھپت ٹپی بیتگ اَنت-
گیشین اھوالانی رد ءَ چہ کرمان ءَ دراتکگیں بس روکپتی بلوچستان ءِ دمگ ایرانشھر ءَ چپ بیتگ ءُ اود ءَ ھاتم ایرانشھر نادراہ جاہ ءِ رد ءَ بیران بیتگیں مردمانی کساس یازدہ ءَ سر بیتگ اَنت-
ھسپتال ءِ رد ءَ دگہ ھپت مردم کہ ٹپی اَنت ءُ ایشانی جاور ھم ناگیگ اَنت ءُ ھترہ ءِ واڑ ءِ توک ءَ اَنت –
وئیل گوستگیں شپ ءِ ساھت سَے ءُ نیم ءَ ایرانشھر ءِ ھند دنشگاہ ولایت ءَ پیش اتکگ کہ ھما جاہ ءَ دو مردم بیران بیتگ انت ءُ پد ءَ نادراہ جاہ ءِ سر بوگ ءَ بیرانیانی کساس یازدہ ءَ سر بیتگ اَنت ءُ ھپت کسانی جاور ناگیگ گوشگ بوگ ءَ اِنت-
سیستان ءُ بلوچستان ءِ دگ ھونی جوڑ بیتگ انت کہ اود ءَ ھمک روچ بازیں کچے ءَ مردم دگ ءِ وئیلانی سبب ءَ مرگ ءِ آماچ بوگ ءَ اَنت- گوستگیں شپ ءَ پیش اتکگیں وئیل ءِ سبب دگ ءِ چپ ءُ چوٹی گوشگ بوگ ءَ اِنت-