نوشکی: ڈیورنڈ لائن ءِ سر ءَ پاکستانی پوج ءُ اوگان لشکر ءِ میان ءَ جنگ ءُ چوپ، پاکستانی لشکر ءِ یک کارندے مرتگ

بلوچستان ءِ دمگ نوشکی ءِ نزیک ءَ ڈیورنڈ لائن ءِ سر ءَ پاکستانی پوج ءُ اوگان لشکر ءِ میان ءَ جنگ ءُ چوپ بیتگ کہ چریشی ءِ آسر ءَ پاکستانی لشکر ءِ یک کارندھے مرتگ-

پاکستانی واکدارانی رد ءَ اے جنگ ءُ چوپ یکشمبے سھب ءَ بنجاھی شھر شال ءَ کساس دو سد کلو میٹر ءِ دوری ءَ نوشکی ءِ دمگ گزنلی ءَ بیتگ-

ڈپٹی کمشنر نوشکی امجد حسین سومرو ءَ جنگ ءُ چوپ ءِ ھال راست کتگ بلے دگہ گپ نہ جتگ اَنت-

گوشگ بوگ ءَ انت اے جنگ ھما وھد ءَ بندات بیتگ کہ فرنٹیئر کور بلوچستان نوشکی ملیشیا یک سد ءُ دو ونگ ءِ کارمند گزنلی چیک پوسٹ ءَ ٹاور نمبر شش ءَ ڈیورنڈ لائن ءَ پاکستان ءِ نیمگ ءَ جنگ بیتگیں ٹٹ ءَ کار ءَ بیتگ اَنت ءُ ھمے ھند ءَ ٹٹ ءِ پروشگ ءِ ھم ھال انت-

وھدیکہ ایف سی ءَ سیسمر پروشتگ ءُ اوگان ھاک ءَ شتگ ءُ اود ءَ اوگان ءِ سلاہ بندیں کارندھاں تیرگواری بندات کتگ ءُ چریشی ءَ ایف سی ءِ سوبیدار طارق اقبال زدگ بیتگ-

ایف سی ءِ کارمنداں پسھی کاروائی کتگ ءُ داں تیرگواری یک ادارے ءَ برجاہ بیتگ-

بیست ءُ ھپت سالی ئیں سوبیدار طارق ءِ لاپ ءَ تیر لگگ ءَ ٹپانی نہ سگگ ءَ مرتگ ءُ آئی ءِ لاش بنکی ھنکین لکی مروت ءَ دیم دیگ بیتگ-