جندندری ءِ لیکہ ءُ سربلند
نبشتہ کار :سنگین بلوچ
دی بلوچستان پوسٹ
دری راجانی گْوستانک، پہ بلوچ راج یک راجے ءِ جھد ءَ زانگ بیت۔ بلے پہ بلوچ ءَ بلوچ دودمانے ءُ زندگ مانگ ءِ لیکھے۔ کہ بلوچ ءِ پرزند وتی بلوچ بیگ ءَ پھر بند اِیت۔ ھردے بلوچ ءِ پرزند ءَ وتی بلوچی مار ات گڑا پہ آئی ءَ را اے مانا نہ دار اِیت کہ من ءَ چے بیگی اِنت؟ ءُ چون بیگی اِنت؟ بلوچ بیگ آئی ءَ را سرجم کنت۔
اگاں زوراک پہ زوراکی ءُ تاراجی ءَ لانک بہ بند ایت۔ گُڑا پہ آئی ءَ را بلوچ بس بلوچ ءِ رنگ ءُ نام ءَ گندگ ءَ کَیت اِنت۔ بہ گند ئے مئے راجدپتر پہ ما اے گْواھی ءَ وت دنت کہ بلوچ ءِ لیکہ ءُ شھزانتی پگر بیدے بلوچ ءَ دگہ ھچّ بوت نہ کنت۔ پمیشکا بلوچ وتی راجدپتر ءَ پہ شانے گیر کار اِیت ءُ وتی جنگانی کارنامگاں پہ پھر بند ایت۔
جنگ زندگی ءِ مستریں بھر اِنت۔ جھان ءِ ھرچ ھند ءَ کہ انسان زندگی کنگ ءَ اِنت۔ یاکہ انسان ءَ زندگی کتگ اود ءَ جنگ ءِ کارپد الم ھست اَنت۔ بلے جنگ اگاں راجی مانِشت ءُ پگری لیکہ ءِ بہ بیت، اود ءَ جنگ وتی رنگ ءَ الم مٹین ایت۔ کہ باز براں انسان ءَ وتی زندگ دارگ ءَ پہ جنگ کنگ ءُ مِرَگ ءِ لیکہ دوستر بیت ءُ مرگ ءَ گچین کن اَنت۔
گْوستانک ءَ جندندری ءِ لیکہ سک باز کُھن اِنت ھمے پیم ھرچ راج ءِ گور ءَ سُکرات ءِ پیمیں شھزانتے وتی شھزانتی ءِ ابدمان بیگ ءَ پہ زھر ءِ کدہ ءَ تنگ ایت ۔ شھید ابدالھمید بلوچ را کہ تیرگواری کنگ بیت اسل ءَ اے آئی ءِ جندندری ءِ پگری لیکہ بیت کہ گوں تیرانی توار ءَ بلوچ ءِ گوشاں کپ ایت۔ آئی ءِ جند ءَ اے سما بیت گوں ھمے تیراں منی نشانگ کتگیں مرد نہ مر اِیت بلے من الم مراں بلے منی مرگ منی راج ءِ پھازگ ءَ گْواہ مان اِیت۔
راجدپتر ءُ گْوستانک ءَ اگاں کسے ءَ جندندری کتگ ۔ آئی ءَ زندگی ءِ پگری دروشم المّی ءَ دیستگ ۔بلے جندندری باسما ءُ سوگھی ءُ آگھی لوٹ اِیتجندندری ئیں مردم چہ وت ءَ آگاہ ءُ سرپدیں مردم لیک اَنت کہ آیاں وتی سما گْور اِنت ءُ اے گام پہ گوں سمائی ءَ زور ایت ئِے۔ چیا کہ اے یک سمائیں گامگیجے ۔
بلوچ راجدپتر چہ جنگی کنگراں چکار اِنت۔ بلے ھستیں دَور ءِ اے جنگ ءَ بلوچ راج ءُ دری جھان ءَ کہ جکسینتگ اے جنگ ءِ مستریں بےسوبی کہ دژمنیں تاکت ءَ را رستگ گُڑا چہ جندندری کنگراں، بلے اے لڑ ءَ انچیں مزن کِرد ورناھاں وت ءَ کربان کتگ آیانی پگری پھنات ءِ ٹپاسگ چہ آیانی کربان کنگ ءَ شاھیگان تر اِنت۔ پروم ءِ کوچگ ءَ انور ءِ گس ءَ ودی بوتگیں اے ورنا کہ چہ وتی کساں سالی ءَ ماں گوادر ءِ چؤلانی پْروشگ ءِ ساز ءَ آ زندگی ءِ سوت ءَ جنت ءُ زندگی ءِ پگری پھنات ءَ گوں نوکیں سُر ءُ سازاں نازین اِیت ۔اے راگ کہ سربلند ءِ اندر ءَ سر کشّ اِیت۔ اے انسانی پگر ءِ مانشت ءِ سُراں چہ ساز کپتگیں راگے۔ بلوچ بیگ ءِ سُرانی راگ ءَ کہ سوت چست بیت۔ اد ءَ پہ رند ءَ ابدمانی وَ بیگی اِنت۔ اد ءَ زندگی ءَ را زانگ وَ پاد کنگی اِنت۔ کسانیں بالاد ءَ گوں پُرکیلیں پِگر ءُ سَسّا ءِ نام اَت سَربُلند۔ چَہ دَر کسانی ءَ کِہ اِنسان ءِ دِل ءَ پہ زَمین ءَ ھدوناکی ءِ جاہ بِہ جنت آ وھد ءِ ھمراھی ءَ ودّ اِیت ءُ رُدان بیت گڈسر ءَ آ دیوانگی اِشکے جوڑ بیت۔ ءُ اِشک کہ انسان ءَ بِہ بیت آئی ءَ را گنوکی ءِ گڈی سیمسراں کاریت ءُ سَر کنت۔۔ ءُ من ھمے گْوشاں سَربُلند ءَ اِشک ءَ گوں وَت پیچ اِتگ اَت۔ زَمین ءِ اِشک ءَ ،وتن ءِ نِشہ آئی ءِ رَگ ءُ بندانی تہ ءَ گَردِش ورَگ ءَ اَت کہ آئی ءَ را اَنچو سرمتاب ءُ سرمچار ءِ کُتگ اَت کہ آئی ءَ وتی وشّی، کسانی، زِند ءِ لِزّت ءُ جَوانی ءِ کُمار درُست پاد ءِ چیر کُت اَنت ءُ رَپت پہ پھازگ ءَ زَمین ءِ۔
سربلند پہ سرانی بلندی ءَ چو سکرات ءَ زھر تِنگ اِتبلے سُکرات پہ وتی زندگ دارگ ءُ وتی شھزانتی ءِ کنٹ ءَ دگہ ارواھے ءِ مان کنگ ءَ پہ اے کدّہ پہ وت گچین کت۔ بلے سربلند پہ وتی ھمسروکاں پہ بلوچ بیگ ءِ سکین بکشگ ءَ وت ندر بوت۔ آئی ءَ اے سوڑگ آئی ءِ بودناکی ءِ گْواہ اِنت۔ دژمن ستر زوراور بہ بیت۔ بلے ھردے بلوچ ءِ پرزندانی مجگاں بلوچ بیگ ءُ راج پھازی ءِ سُراں کہ سر کشّ اِت۔ اد ءَ سکرات بیگ ءَ دیر نہ کن اَنت اگاں بلوچ ءَ وتی پرزنداناں چہ وتی میراس ءَ چیزے بکشاتگ آ پھازگ ءِ مڑاہ اِنت کہ بلوچ پُشت در پُشت وتی اوبادگاں بکشاھگ ءَ اِنت راج پھازی ءُ بلوچ بیگ ورنائیں سر ودی کن اَنت ءُ اے میراس پہ ھما اوبادگانی ونڈ ءَ گپت کہ پہ سرانی بلندی ءَ سربلند بہ اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-