شال : راشد حسین ءِ یل نہ کنگ ءِ ھلاپ ءَ کھول ءِ زھرشانی

راشد حسین ءِ زورانسری آوار جنی ءُ یل نہ کنگ ءِ بگیری ءَ بلوچستان ءِ بُنجاھی شھر شال ءَ یکشمبے ءِ روچ ءَ کھول ءِ نیمگ ءَ چہ یک روانکے کشگ بیتگ، چریشی ءَ زورانسری بیگواھیں مردمانی کھولاں اَبید سیاسی باسکانی مزنیں کچے ءَ بھر زرتگ-

زھرشانی کنوکانی دست ءَ بیگواھیں مردمانی اکس، بینرز چست کتگ انت ءُ زورانسری بیگواہ ءُ بلوچ چُکچینی ءِ بگیری ءَ اوگام جتگ انت-

راشد حسین ءِ مات ءَ گْوشتگ کہ منی چک دوھزار ءُ ھژدہ ءَ دسمبر ءَ متھدہ ارب امارات ءِ چیریں ادارھانی دست ءَ دزگیری ءَ پد پاکستان ءَ برگ بیتگ –

آئی ءَ گْوشتگ کہ پنچ سال ءَ ساری راشد حسین پاکستان ءِ گوشگ ءَ چہ متھدہ ارب امارات زورانسری بیگواہ کتگ پاکستان ءَ آرگ بیتگ اے زورانسری آوار جنی ءَ پاکستان ءُ متھدہ ارب امارات ءِ چیریں ادارہ ھوار بیتگ اَنت-

راشد حسین ءِ کھول ءَ گْوشتگ کہ آ گوستگیں پنچ سالاں چہ ریاست ءَ گوں انساپ ءِ اوست ءَ آمیدگس ءُ بیگواھیں مردمانی کمیشنزا ھوار بیگ ءَ اِنت آیاں انساپ دیگ جاگہ آ ترسینگ ءُ دلسیاہ کنگ بیگ ءَ اَنت ءُ آمیدگس ءُ چہ کیسر در کنگ بیگ ءُ تنی وھدے ھمے جاور اَنت، ھائی کورٹ ءُ آئی ءِ کس ءِ گوشدارگ بند کتگ ءُ تاریک دیم ءَ برتگ-

آئی ءَ انسانی ھکانی ادارہ ءُ میانی استمانی راج ءَ گوں دزبندی کتگ کہ آ ریاست ءَ چہ راشد حسین ءِ درگت ءَ جست بہ کن اَنت ءُ راشد حسین ءِ یل کنائینگ ھاتر ءَ کرد ءَ پیلو بہ کن اَنت آیانی پنچ سالیں ودار ءَ آسر بہ کن اَنت-