بلوچ ریپبلکن پارٹی ءِ سروک جارکش شیر مھمد بگٹی ءَ پاکستانی رسانکدر ءِ سر ءَ شنگ بوتگیں تواربند رد کتگ ءُ ایشی ءِ سوب بی آر پی ءِ سروک نواب برھمدگ بگٹی ءَ گوں کتگ ۔
بی آر پی ءِ جارچین ءَ گْوشتگ کہ ھما ریاستی پروپیگنڈا کہ آئی ءِ تہ ءَ گْوشگ بیت کہ بلوچ یکجھتی کمیٹی ءَ مالی کمک نواب برھمدگ بگٹی ءَ داتگ آ ریاستی دروگ ءَ ابید دگہ ھچ نہ اِنت۔
شیر محمد بگٹی ءَ گْوشت کہ ریاستی گل بلوچ یکجھتی کمیٹی ءُ آئی ءِ سروکی ءَ ڈاکٹر ماہ رنگ بلوچ ءُ سمی دین بلوچ ءِ سروکی ءَ گوادر ءَ راجی مُچی ءِ وڑیں راجدپتری لس مھلوک ءِ سروکی ءَ کتگ ءُ سرجمیں بلوچستان ءَ لس مھلوک ءِ سرجمیں ھمراھی ءَ کرتگ اَنت۔ تُرس ءِ آماچ بنت ءُ وتی راجمانی جُھد ءَ (تخریب کاری) ءِ ھاتر ءَ جتا جتائیں دروگیں تواربند ءُ دگہ چیزانی سر ءَ زور دیگ ءَ انت۔
آئی ءَ دیمتر ءَ گْوشتگ کہ ریاستی زوراکیانی ھلاپ ءَ جھد کنوکیں ھمک مردم، گل یا گل ءِ امن ءُ ایمنی ءِ جھد ءَ بی آر پی سرجمی ءَ کمک کنت، آ بلوچ یکجھتی کمیٹی ءِ دروشم ءَ بہ بیت، یا کجام ھم وکیل، ڈاکٹر یا کجام ھم راجمانی جنز ءِ دروشم ءَ بہ بیت۔
بی آر پی ءِ جارکش ءَ گیش گْوشتگ کہ ریاست ءِ نیمگ ءَ راجمانی درائیں مالی کمک ءِ دروگیں بُھتام ، نوکیں گپے نہ اِنت بلے گوستگیں ھپتاد سالاں چہ ھر وھد ءَ کہ کسے ءَ پوجی زوراکی ءِ ھلاپ ءَ توار چست کتگ گُڑا آ درملکی ایجنٹ ءِ لیبل جنگ بوتگ ءُ آیانی سر ءَ راجدرو ءِ نشان جنگ بوتگ۔
جارکش ءَ گْوشت کہ آیانی ردیانی راست کنگ ءِ بدل ءَ ریاست ءَ زلم ءُ زوراکی ءِ ھلاپ ءَ مزلومیں راجانی نیمگ ءَ چست کتگیں تواراں سرپرست کنگ ءِ جھد کتگ کہ گوستگیں وھد ءَ سوب مند نہ بوتگ ءُ آیوکیں وھد ءَ ھم سوب مند نہ بیت۔ ما پاک پوج ءِ نیمگ ءَ چہ اے وڑیں درستیں پروپیگنڈھاں رد کن ایں ۔