دو روچ ءَ چہ بلوچستان ءَ نودربر وتکشی ءِ دو وئیل نکش کنگ بیتگ اَنت-
پسنی ءِ دمگ سر دشت ءَ چہ کلانچ ءَ میٹرک ءِ نودربر جنید ء صمد ءَ گُٹ ءَ سادے مان کتگ ءُ وتکشی کتگ ، بلے وتکشی ءِ سوب دیم ءَ نیتکگ-
ھالانی رِد ءَ وتکشی ءِ وئیل سے شمبے ءِ روچ ءَ مگرب ءَ پد دیم ءَ اَتکگ- لاش پہ گیشیں پٹ پول ءَ پد کھول ءِ دست ءَ داتگ-
دو روچانی تہ ءَ بلوچستان ءِ نودربر وتکشی ءِ دو وئیل دیم ءَ اَتکگ، گوستگیں روچ ءَ بلوچستان ءِ بُنجاھی شھر شال ءَ تربت ءِ جھمنند چراگ بلوچ ءَ بلوچستان شھدربرجاہ ءِ ھاسٹل کمرہ ءَ گُٹ ءَ ساد مان کتگ وتکشی کتگ-
بلوچستان ءَ وتکشی ءِ وئیل یک تُرسناکیں وڑے ءَ دیم ءَ آیگ ءَ اَنت ھمکروش وتکشی ءِ وئیل نکش بیگ ءَ اَنت اشی ءَ ساری بیست ھپت جولائی ءَ ھم کیچ ءِ دمگ یک کیسے نکش بیتگ کہ اود ءَ ناصر ء حاجی محمد عمر جھمنند دشت شولیگ ءَ ناشناسیں سببے ءَ وتکشی کتگ-