بلوچ راجی مُچی: ھب چوکی ءَ سمی دین ءُ ماھزیب ءِ نام ءَ ارزی نامہ، واشک ءُ آواران ءَ زالبول ءُ باسک دزگیر

بلوچستان ءِ واپاری شھر ھب چوجی ءَ گوستگیں روچاں راجی مُچی ءِ چن ءُ لانچانی لڑ ءَ بھر زیرگ ءِ سر ءَ بیگواھیں مردمانی کھول ءُ بی وائی سی ءُ وائس فار بلوچ مسنگ پرسنز ءِ رھشونانی ھلاپ ءَ ایپ آئی آر نبشتگ کنگ بیتگ-

ایپ آئی آر بیگواھیں ڈاکٹر دین مھمد ءِ جنک سمی دین ءُ بیگواھیں راشد ھسین ءِ براتزتک ماھزیب ءَ ھوار دگہ مردمانی ھلاپ ءَ نبشتگ کنگ بیتگ اَنت-

پولیس ءِ گوشگ اِنت اے مردماں پاکستان ءِ سر ءَ زھر ءِ درشان ءِ تران کتگ ءُ ریاست ءِ ھلاپ ءَ پنتاک بھر کتگ ءُ وال چاکنگ کتگ –

زانگ بہ بیت بلوچ راجی مُچی ءِ واستا سرجمیں بلوچستان ءَ چن ءُ لانچ برجاہ اَنت ءُ دومی نیمگ ءَ انتزامیہ ءِ نیمگ ءَ مردمانی بیگواھی ءُ آوار جنگاں ھوار دگہ رنگ ءُ دروشماں ترسینگ ءَ اَنت-

چہ واشک ءَ اھوال اَنت کہ راجی مُچی ءِ واستا چندہ مُچ کنوکیں مردم واشک پولیس ءَ دزگیر کتگ اَنت ءُ ورنایانی دزگیری ءَ پد مھلوک ءَ واشک ءَ اللہ اکبر چوک ءَ دگ بند کتگ ءُ زھرشانی کنگ ءَ اَنت-

دومی نیمگ ءَ آواران ءِ بازار ءَ چندہ مُچ کنوکیں سیزدہ زالبول آواران بازار ءَ پولیس ءُ ایم آئی ءَ دزگیر کتگ ءُ تھانہ ءَ برتگ اَنت –

ایشاں پیش گوستگیں شپ ءَ چہ کراچی ءَ بلوچ یکجھتی کمیٹی ءِ چار باسک پولیس ءَ دزگیر کتگ ءُ ناشناسیں جاھاں برتگ اَنت ءُ چریشی ءَ پد اے درگت ءَ ھچ اھوال نیست اَنت-