آوار جنگ بیتگیں مختیار احمد ءِ یل نہ کنگ ءِ بگیری ءَ تھتگ بند ءُ نندانک برجاہ ءَ اِنت-
ھاران سراوان ءِ جھمنند آوار جنگ بیتگیں مختیار احمد مینگل چار روچ ءِ گوزگ ءَ پد تنی وھدے یل کنگ نہ بیتگ ءُ نانکہ انتزامیہ ءِ نیمگ ءَ چہ کھول ءُ آیانی یل کنائینگ ءِ درگت ءَ سرپدی دیگ بیتگ-
زھرشانی ئیں نندانک ءَ آوار جنگ بیتگیں مختیار ءُ کھول ھاران ءِ سرجمیں سیاسی پارٹیز ءِ راھشون ءُ جتاجتائیں پڑ مردماں مزنیں کچے ءَ بھر زرتگ آوار جنگ بیتگیں مختیار مینگل ءِ کھول ءَ گوں یکجاھی درشان کنان ءَ دمگی انتزامیہ ءُ رخشان ڈویژن ءِ سرجمیں ٹکی واجکاراں چہ زوت آوار جنگ بیتگیں مختیار مینگل ءِ یل کنائینگ ءِ دلجمی ءِ لوٹ کتگ-
زھرشانی کنوکانی گْوشگ اِنت کہ چار روچ ءِ گوزگ ءَ اَبید دمگی انتزامیہ ءِ آوار جنگ بیتگین ءِ یل کنگ ءَ کیس ءِ درگت ءَ سرپدی دیگ ءَ سرجمی ءَ بے سوب بیتگ اگاں آوار جنگ بیتگیں مختیار یل کنگ نہ بیتگ گُڑا زھرشانی تُرند کنگ بیت ءُ آئی ءِ سرجمیں شمہ واری دمگی انتزامیہ سر ءَ بیت-
زھرشانی نندانک ءَ زھرشانی کنوکاں سروزیر بلوچستان ءُ ایم پی اے ھاران ءَ چہ ڈپٹی کمشنر ھاران ءَ زوت بدل کنگ ءِ لوٹ ھم کتگ-