تربت ءَ زورانسری بیگواھیں مردمانی کھول ءِ زھرشانی ئیں گدان دمگی انتزامیہ کارگس دیم ءَ چارمی روچ ءَ ھم برجاہ-
نندانک ءَ ھک دے تھریک، بی ایس او ءِ گوستگیں راھشوناں ھوار سیاسی چاگردی جُھدکاراں یکجاھی درشان اِتگ-
بلیدہ ءَ ھوار کیچ ءِ جتاجتائیں دمگاں چہ بیگواھیں مردمانی کھول گوستگیں چار روچاں چہ وتی دوستناکانی یل کنائینگ ھاتر ءَ دمگی انتزامیہ کیچ ءِ کارگس دیم ءَ زھرشانی ئیں نندانک داتگ ءُ نشتگ اَنت، نندانک ءَ چہ بلیدہ ءَ سیادی داروکیں مسلم عارف، فتح میار، محمد بلوچ ءِ کھول ءَ اَبید چہ آپسر تربت ءَ سیادی داروکیں جھانزیب فضل، چہ پیدارک ءَ سیادی داروکیں میران حسین، سمیر نعمت اللہ بلوچ، شے کھن ءِ جھمنند ڈاکٹر رفیق بلوچ، ھمے وڑ نثار کریم، حیات سبزل ءُ ولی محمد ءِ کھول ھم زھرشانی ئیں نندانک ءَ ھوار اَنت-
نندانک ءِ چارمی روچ ءَ بی ایس او ءِ گوستگیں چئیرمین کامریڈ ظریف رند، ھک دے تھریک ءِ دمگی چیئرمین حاجی ناصر پلیزئی، مولانا نصیر احمد. سعید جمعہ ، صادو فتح، داد جان رند ءُ دگر کھول گدان ءِ تر ءُ گرد ءَ اَتکگ اَنت آیاں یکجاھی درشان ءِ کتگ، وھدے کہ نندانک ءَ بی ایس او پجّار ءِ دمگی سروک یاسر بیبگر ءُ ورنا ایں چاگردی باسک حمید بلوچ ھم ساڑی بیتگ-
زھرشانی گدان ءَ نشتگیں کھولانی لوٹ اِنت کہ آیانی دوستناک اگاں میاربار اَنت گُڑا آیاں ڈیھی کانود رد ءَ آمیدگس ءَ پیش بہ کن اَنت، زورانسری بیگواہ کنگ ڈیھی کانود ءُ راھبندانی بگیری اِنت اے مارا کبول نہ اِنت ما اشی ءِ بگیری ءَ جُھد کن ایں-