عمان ءِ بنجاھی شھر مسقط ءَ پولیس ءِ رد ءَ سَے شمبے ءَ یک مسیتے ءِ نزیک ءَ تیرگواری ءَ چار مردم بیران بیتگ انت ءُ بازینے زدگ بیتگ انت-
ھال سر کنوکیں ادارہ اے ایف پی ءِ رد ءَ رائل عمان پولیس ءَ یک درشانے ءَ گوشتگ آیاں ’الوادی الکبیر ءَ یک مسیتے ءِ نزیک ءَ تیرگواری ءِ وئیلے ءَ پسھی بیڑ برتگ‘-
پولیس ءَ بنداتی دراتکی مسقط ءَ یک مسیتے ءِ نزیک ءَ چار مردمانی بیرانی ءُ بازینے زدگ بوگ ءِ ھال داتگ-
چاگردی ترامجاہ ایکس ءَ پولیس ءَ یک درشانے ءَ گوشتگ ’ جاورھالانی گر ءُ دار ءَ دراھیں پھزداری گامگیج ءُ ڈول سرجم کنگ بیتگ اَنت ءُ واکدار سبب ءِ زانگ ءِ پٹ ءُ پول ءَ اَنت –