دی بلوچستان پوسٹ
روکپتی بلوچستان ءِ دمگ سراوان ءَ ایرانی لشکر ءَ تیل کشین پرپٹ ءِ سر ءَ تیرگواری کتگ ءُ یکے کشتگ ءُ یکے زدگ کتگ-
گیشیں اھوالانی رد ءَ تیرگواری ءِ وئیل سراوان ءِ ھند کلگان ءَ پیش اتکگ کہ اود ءَ سیمسری ھند بن سر ءِ پھزداراں ابید ءِ دارگ ءَ یک پرپٹے ءِ سر ءَ تیرگواری کتگ ءُ یک مردمے چریشی ءَ بیران بیتگ ءُ یکے زدگ بیتگ-
بیران بیتگین مردم ءِ پجار بیست ءُ یک سالی ئیں جمشید گمشادزئی ء مھمد ءِ نام ءَ زانگ بیتگ ءُ زدگ بیتگین ءِ پجار اکرم گمشادزئی ءِ نام ءَ زانگ بیتگ –
اھوالانی رد ءَ تیرگواری ءَ بیران بیتگیں ءُ زدگ بیتگین نادراہ جاہ ءَ برگ بیتگ اَنت-
جمشید ءِ کھول لاش ءِ دزگرگ ءَ شتگ گڑا اود ءَ ڈاکٹراں لاش نہ داتگ ءُ گوشتگ رجیمنٹ ءِ لشکر ءِ کاگد المی اِنت-
زانگ بہ بیت روکپتی بلوچستان ءِ سیمسری ھندانی کار ءُ روزگار تھنا سیمسر ءَ گوں بندوک اِنت کہ ایشی ءِ سبب ءَ بازیں کچے ءَ اود ءَ مردماں مرگ ءِ دیمپانی کنگ کپگ اِنت-