نِبشتانک: بلوچی زُبان ماں گُوگل ٹرانسلیٹ ءَ
نبشتہ کار : شاہ جان دشتی
دی بلوچستان پوسٹ
رمس 27 جلکان 2024 ءَ گُوگل رپورٹ ءِ رِد ءَ گُوگل رجانک (google translate)ءِ تہ ءَ یکسد ءُ دہ(110) زُبان ھوار کنگ بیتگ ءُ آھانی تہ ءَ یکے بلوچی اَت۔
ھستیں دور ءَ تیوگیں دُگنیا ءِ تہ ءَ ھپت ھزار(7000) ءَ چہ گیش زُبان گوشگ بیت انت، اِیشانی تہ ءَ تھنا دوسد ءُ چِل ءُ سئے(243) زُبان گُوگل رجانک ءِ تہ ءَ ھوار اَنت۔ اے مئے وش بھتی اِنت کہ مئے زُبان (بلوچی) ھم گُوگل رجانکانی لڑ ءَ گون اِنت۔
نوک ھوار بیتگیں زُبان : گُوگل ٹیم ءِ رِد ءَ 110 زُبان گُوگل رجانک ءَ ھوار کنگ بیتگ اِیشانی مول ءُ مُراد درائیں دُگنیا ءِ مُردماناں یکجاہ کنگ ءُ مردمانی ھیال ءُ لِیکھاں یکے دومی ءَ سرپد بوھگ ءِ آسراتی دیگ۔ بلے اے زبان کہ نوک گُوگل رجانک ءَ ھوار کنگ بیتگ آں اِیشانی تہ ءَ کمے نِزوری گِندگ ءَ کیت کہ اِشانانی تہ ءَ ھستیں رجانکی بِزانت رد بنت پرچاکہ نوک ھوار بیتگ انت، گُڑا اے درگت ءَ گُوگل ءَ یک آسراتیے داتگ کہ کُجام بی وھد ءَ شُما یک بھرگے رجانک ءِ واستا گُوگل ءَ دات ءُ شُما دیست کہ آئی ءِ رجانک ءِ تہ ءَ ردی ھست اِنت۔ گُڑا گُوگل ءَ ترا امد ءَ اوپشن داتگ کہ تو ردیں رجانک ءَ راست کُت کن ئے ءُ وتی ھیالاں گُوگل ءَ سرپدی دات کن ئے۔
مئے مھلوک ءِ پدکِرد :اے یک بلائیں شاتکامی ءِ ھبرے کہ مئے زُبان (بلوچی) گُوگل ءِ رجانکانی لڑ ءَ ھوار بیتگ بلے دومی نیمگ ءَ لس مھلوک گالرد ءَ رجانک کن اَنت ءُ کُجام ھم گالردے ءِ رجانک کہ رد بیت۔ایشی ءَ ابید کہ آ گُوگل ءِ اوپشن ءَ بجن انت ءُ رجانک ءَ راست بکن انت، گُوگل ءَ وتی ھیالاں بِدیاں،کہ اے ردی راست کنگ بہ بیت، بلے مردم ھمے ردیں رجانک ءَ چاگردی رسانکدر ءَ شِنگ کن اَنت ءُ مسکرا ءُ کلاگ زور انت۔
لس مھلوک چے کِرد پیلو کُت کنت پہ زُبان ءِ دیمروئی ءَ ؟ انچش کہ جھانگیر بلوچ ءُ بلوچ راج ءِ جُھد ءُ ھمت ءَ بلوچی زُبان رجانکانی لڑ ءَ ھوار کنگ بیتگ۔ نوں پہ گُوگل رجانک ءِ تہ ءَ زُبان ءِ دیمروئی ءِ ھاتر ءَ لس مھلوک بلائیں کِردے پیلو کُت کنت۔ مردم کُجام ھم وھد ءَ گالردے یاکہ بھرگے بلوچی ءَ رجانک کن آں ءُ گِند آں کہ آئی ءِ رُجانک رد اِت گڈ ءَ ھمے رجانک ءَ راست بکن اَنت ءُ گُوگل رجانک ءَ وتی ھیالاں بدیاں، گُڈ ءَ دیمتر ءَ اے نِزوری گار باں ءُ زُبان دیمرئی ءِ نیمگ ءَ جُنزان کنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔