آسروک 28 مئی 1998
نبشتہ کار:ندیم بلوچ
دی بلوچستان پوسٹ
“راسکوہ ءِ اِسپیتیں کوھانی سر ءَ”
“چو کپن پوشیں بلوچ ءِ زندگی”
28سوچکان 1998 ھما روچ اِنت کہ اے روچ ءَ بلوچستان ءِ سرزمین چاگی ءِ دل بند راسکوہ ءِ تَلاریں سِنگ گوں جوھری تراکاں آسشانگ بیت ۔ پاکستان پد ماں پد وتی پنچ جوھری ٹوپ چکّاس Test Experiment ءِ نام ءَ راسکوہ ءِ دلبند ءَ دور دنت ۔ کہ ایشی ءَ چہ دنیگت اود ءِ لس مھلوک چو دلوت ئیگ ءَ مِرَگ ءَ اَنت ۔ ءُ دومی نیمگ ءَ پاکستان ھمُک سال اے روچ ءَ ” یوم تکبیر ” ءِ نام ءَ یات داراِیت ءُ شاتکامی کنت ۔ بلے ما بزانکہ بلوچ اے چیز ءَ بے ھیال مہ بہ ایں کہ بلوچستان ءِ لَس مَھلوک ءَ پہ اے روچ چہ مھشر ءَ کمتر نہ انت ۔ پرچہ کہ اے روچ ءَ چاگی ءِ مھلوک ءَ چم ءِ وت وتی زھگ ءُ مردم مَرگ ءَ دیستگ اَنت ، سرسبز ءُ گُلباگیں زمین سُچگ ءُ ھُشک بیگ ءَ دیستگ ، درچک ءُ سبزاوگ گیمُرگ ءَ دیست اَنت ءُ ایشی ءِ سوب ءَ وڑ وڑیں نادُراھی شِنگ اِت چوشکہ کینسر ، ھُونلاپ (Dysentery ), سْیھ تَپ (Typhoid) , ٹِیبی (Tuberculosis) ،نا سرجمیں چُک ءِ ودی بیگ ءُ دگہ بازیں نادُراھی کہ ایش دنیگت اود ءِ مھلوک ءِ چُکچینی ءِ کار ءَ کنگ ءَ اَنت ۔مرچی ما گندیں کہ اے نادُراھی چاگی ءَ ھوار نوشکی ، ھاران ءُ بلوچستان ءِ دگہ بازیں دمگاں شنگ اِتگ اَنت ۔ پمیشکہ پہ بلوچ راج ءُ بلوچستان ءَ اے روچ ” سیاھیں روچ “Black-day ، یا ” یوم آسروک ” ءِ نام ءَ یاد کنگ بیت ۔
ما وھدے جوھری تراکانی پُشدر ءَ چاراِیں گُڑا اے چیز مارا گندگ ءَ کئیت کہ زورآوریں اِستاناں دائم پہ وتی زُور ءُ تاکت ءِ ماں دُگنیا ءِ دیم ءَ منّارینگ ،دژمنیں اِستان آں وتی زُورمَندی ءِ پیش دارگ ، گُلامیں راجانی چُکچینی ءُ ھمے تاکت ءِ برورد ءَ گُلامیں راج ءِ سر ءَ وتی لُٹ ءُ پُل ءَ برجم دارگ ءِ واستا ھمے دابیں شوربندیانی سر ءَ کاربند بوتگ اَنت ۔ مرچی اگاں بلوچستان ءَ اے دابیں شوربندی کارمرز بوھگ ءَ اِنت گُڑا ایشی ءِ سوب اوں ھمیش اِنت کہ زورآور بلوچ ءِ چُکچینی ءَ کنگ لوٹ اِیت-
وھدے دومی جَھانی جنگ ءَ امریکہ ءَ جاپان ءِ شھر ہیروشیما ءُ ناگاساکی سر ءَ جوھری اُرش کُت گُڑا چہ ایشی ءَ جاپان ءِ سرجمیں شھر تباہ بوت اَنت ، جاپانی لَس مَھلوک ءِ چُکچینی بوت، ناگاساکی ءَ کساس 74 ھزار مردم بیران بوت ۔ھمے داب ءَ ہیروشیما ءَ ۱ لکھ ۴۸ ھزار مردم بیران بوت ، موسُمی جاورال مٹ بوت اَنت کہ چہ ایشی ءَ ھزار دروشُمیں نادُراھی ودی بوت اَنت ءُ جاپان سرجم ءَ تباہ بوتگ اَت ۔سرجمیں دگنیا ءَ وھدے جاپان ءِ تباھی دیست گُڑ اِد ءَ چہ جوھری ٹوپانی سر ءَ یک ترانے بندات بوت کہ جوھری ٹوپانی سرءَ بَندش جنگ بہ بیت کہ اے پہ سرجمیں دُگنیا ءَ تاوان ءُ سانمند اَنت ۔ بلے پاکستان سرجمیں دگنیا ءِ پابندیاں لگتمال کنت پرچہ کہ آئی ءَ امریکہ ءِ مدد ءُ کُمک گوں بیت ءُ 1974 ءَ زلپکار الی بٹھو ءِ سرکار ءِ زمانگ ءَ اے پیسلہ بیت کہ آ ھم جوھری ٹوپ جوڑ کن اَنت ۔ 1983ءَ پاکستان ڈاکٹر عبدالکدیر ھان ءِ چیردستی ءَ وتی جوھری سلاھانی کارءَ بِندات کنت کہ دیمتر ءَ ۲۸ مئی ۱۹۹۸ ءَ پاکستان ءِ وتگڑیں سروزیر نواز شریپ ءُ بلوچستان ءِ نام نِھادیں راجدوست سروزیر اکترمینگل ءِ سربراھی ءَ چاگی ءِ سرءَ جوھری اُرش کنگ بیت بلوچستان ءِ وتگڈیں راجدوستیں گَل (بی این پی ) ءُ آئی ءِ مستر اکترمینگل ءَ وتی گَل ءُ سیاست ءِ رکینگ ءِ ھاتِر ءَ روایتی ھساب ءَ ھمے گپ جَت کہ من سَرپد نہ بیتگ آں کہ چُشیں چِست ءُ ایرے ھَست-
بلوچ راج سرپد بہ بیت کہ وھدے پاکستان ءَ وتی ایٹمی ٹوپ بلوچستان ءِ سرزمین چاگی ءَ چکّاس Experiment اِت اَنت ، ھمے چکّاس جاہ ءَ چہ ۲۰ کلو میٹر دُور لس بلوچ آباد بنت کہ پاکستان آیانی پرواہ ءَ نہ کنت۔ اِدا چہ اے پدّر بیت زالم ءُ زورآوَر ءِ گورءَ گُلامیں راج ءِ زِند ءَ ھِچ اَرزِشت نیست ، آئی ءِ گورءَ گلام ءِ زِندگی ءَ چہ گُلام ءِ زمین ، گُلام ءِ مال ءُ مڈی ، سُھر ءُ تِلاہ گیش اَرزِشت دار اَنت ۔ وَھدے ما جَھانی کانُود ءُ راھبنداں چاراِیں گُڑا آیانی رِد ءَ جوھری چکّاس ھما جاہ ءُ ھَنداں کُت کن اِت کہ اود ءَ ۲۰۰ کلو میٹر ءِ دوری ءَ ھَچ مردمی آبادی مہ بیت ۔بلے پاکستان کہ دُگنیا ءِ مزنیں تاکتانی مُپادانی پاھازوک اِنت پہ آئی ءَ چُشیں پابندی دانکہ جھان ءِ مُپاد گوں آئی ءَ بندوک اَنت ۔ پمیشکا ما گِند اِیں کہ پاکستان پہ بلوچ ءِ کُوش ءَ ھِچ وڑیں راہ ءُ راھبند نہ چار اِیت-
ھمے نادُراھی کہ جوھری تراکانی سوب ءَ ودی بنت مرچی چاگی ، نوشکی ، ھاران ، حُضدار ءُ بلوچستان ءِ بازیں دمگ چہ ایشی ءَ سانمند اَنت ۔ بلوچستان مرچی وَبا ءُ نادُراھیانی بُنجل جوڑبوتگ کہ ایشانی تہ ءَ شومُک گیشتر تُرسناک اِنت ۔ یک رپورٹ ءِ رِدءَ بلوچستان ءَ شومُک ءِ نادُراھی ءِ سَوَب ءَ یک سالے ءِ تَہ ءَ ۳۰۰۰ ءَ بُرز مردم بیران بیت ءُ ھمُک سال کوئٹہ ءِ CENAR اِسپتال ءَ شش ۶۰۰۰ ھزار ءَ گیش شومُک ءِ کیس رپورٹ بیت ۔
یک نیمگے اگاں چاگی ءِ مردُم واری ءُ بزّگی ءِ زندے گوازینگ ءَ اَنت تاں دومی نیمگ ءَ ریاست ھمے چاگی ءِ مال ءُ مڈّیاں ریکوڑک ءُ سیندک ءِ وڑیں میگاپروجیکٹسانی نام ءَ لُٹ ءُ پُل کنگ ءَ اِنت ۔ریکوڈک دگنیاءِ پُنچمی مستریں سُھر ءُ پُوپَل ءِ مڈّیانی کَھن گُشگ بیت ۔ ٹی ٹی سی ءِ پَٹ ءُ پول ءِ رِدءَ ریکوڈک اکتسادی ھساب ءَ ۲۰۲ ارب ٹن ءِ کارآمدیں کَھن ءِ بَھرے ، وَھدے ۲۰۱۹ ءَ انٹرنیشنل کورٹ آف جسٹس ءِ نیمگ ءَ پاکستان ءِ سرا شش ارب ڈالر ملام جنگ بیت تاں آ وھدءَ پاکستان ءِ مالی جاور گیگ نہ بنت گُڑا آئی ءَ چاگی ءِ سرجمیں مادن ءُ مڈی وتی نپ ءُ سیتانی دیناں “بیرک گولڈ” ءَ دات اَنت ۔ اے شوربندی ءِ سرا کساس چِل سال ءَ کار بیت کنت۔ بیرک کمپنی ءِ گشگ اِنت سالے چِداں ۸ کروڑ ٹَن سُھر ءُ تانبا کشگ بیت ۔
دُگنیا ءِ بُندپتر ءَ چہ ھرچ جوھری تراکے بوتگ گُڑا آ مُدام نزوریں راجانی ڈیھ ءِ سر ءَ چکّاسگ بوتگ اَنت بزانکہ آیاں مُدام پہ نزوریں راج ءِ چُکچینی ءِ نیّت ءَ اے دابیں شوربندی کُتگ ۔ ایشی ءِ مستریں درور امیریکہ ئیگ اِنت کہ آئی ءَ جاپان ءَ ھوار ویتنام ءِ ایردستیں مھلوک ءِ سرءَ چُشیں زالِمی کُتگ کہ آئی ءِ مول ءُ مُراد تھنا مھلوک ءِ چُکچینی بوتگ ۔ بلے ھما راج ءِ کہ جزبگ مُھر بوتگ گُڑا آیاں جوھری تراکاں ھم ھِچ سان دور نہ داتگ ءُ زورآور ءِ چنگُلاں چہ وتارا رکّینتگ چوشکہ ویتنام ءِ مھلوک ءَ اے کُتگ ءُ پیشداشتگ کہ آ پہ ایردستیں راجاں سکین اَنت ۔ نوں بلوچ راج ءَ لوٹ اِیت کہ آ اِستان ءِ اے دابیں شوربندیانی بگیری ءَ بہ اوشت اَنت ءُ جدوجھد بہ کن اَنت ۔ پرچہ کہ بلوچ ءِ گورءَ گھگیری ءَ اَبید ھِچ راہ پش نہ کپتگ ءُ دُگنیا ءِ تہ ءَ چُشیں درور مارا ھم دست نہ کپ اِیت کہ زورآور وت دراَتکگ اَنت ءُ شُتگ اَنت ۔ چوش بہ نہ بوتگ ۔ اگاں مرچی گُلامیں راجاں وت ءَ زورگیر ءِ دست ءَ آجو کُتگ گُڑا آیاں کُربانی داتگ ۔ اگاں گھگیری نہ کُت ءُ کُربانی نہ دات گُڑا آ ریاست آرام ءِ سرءَ تئی زمین ءِ مال ءُ مڈّیاں پُل اِیت تئی چُکچینی ءَ کنت ۔ کہ اے چیز بلوچستان ءِ تہ ءَ پدّر اَنت ءُ مئے دیم ءَ اَنت ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔