زُبان دوستی ءُ بلوچ ورنا
نبشتہ کار: سازبان بلوچ
دی بلوچستان پوسٹ
گُلامی ءِ زمانگ ءَ کتاب ءِ سر ءَ پابندی جنگ، زبان ءِ ھلاپ ءَ پندل سازگ، نبشتہ کارانی گِرگ ءُ بند کنگ، ءُ ورنایانی تہ ءَ نشہ ءُ سلکاری آرگ درست سرکار ءِ پالیسیانی بھر اَنت بلے جیڑہ ھما وھد ءَ پاد کئیت وھدیکہ ایر دستیں راج اے رنگیں پندلاں نہ پھم ایت ءُ وت ءَ ایمن کنت۔
ایشی ءِ یک مسالے ما وَت، ھاس وانندہ ایں کہ چہ وتی زاتی نپ ءُ پائدگاں در نیا ایں۔ مرچی بلوچ نودربر یک گپے وتی مجگ ءَ جاگہ بدے اَنت کہ چہ وتی جند ءِ زات ءَ نہ گیشّ اتگیں مردم کدی ھم گل یا جھد ءِ ھمراھداری ءَ کت نہ کنت۔ آ وتی مھلوک ءِ درد ءَ نہ وارت۔ چاگرد ءِ تہ ءَ پہ گھتریں کردے ءَ لازم اِنت کہ ما پیسر ءَ وتی راہ ءُ لیکہ ءَ بہ گیشّین ایں۔
ما راج دوستی ءِ لیکہ ءَ وان ایں گُڑا سرپد بہ ایں کہ اے لیکہ بید ء زبان درستی ءَ ناسرجم اِنت۔ پہ راجی جنز ءَ زبان دوستی ءِ ارزشت اے ھاتر ءَ سک باز اِنت کہ زبان ءِ تہ ءَ راج ءِ سرجمیں ربیدگی مڈی چیر انت۔ اے ھمے زبان اِنت کہ پہ آھوکیں پدریچاں راجدپتر ءِ کسھاں کار ایت، راج ءِ گْوست ءَ بیان کنت، مزاھمت ءُ دیمونی ءِ مانا ءَ گْوش ایت گوں۔ اگاں زبان پشت مہ کپ ایت، نہ تئی گْوست مان ایت، نہ کہ دود۔۔۔ راج بید ء دود ءُ ربیدگ ءَ چی یے؟ بلوچ ءِ زبان باز اَنت ءُ اے بدیں ھبرے نہ اِنت۔ بازیں راجانی زبان باز بنت بلے پرے ھبر ءَ آیانی دود ءُ ربیدگ بھر نہ بیت۔ باز مردم ھمے چیز ءَ نامہ یے کنت کہ بلوچ ءِ وَ زبان باز انت۔ ما کجام زبان ءَ دوست بدار ایں۔ پہ کجام زبان ءَ کار بہ کن ایں۔۔۔ اے نامہ یے۔ پہ ھرچ بلوچ ءَ اژدری اِنت کہ وتی ماتی زبان ءَ دوست بدار ایت ءُ ایشی ءِ ھمراھی ءَ راج ءِ اے دگہ زباناں ھم ارزشت بہ دنت۔ اے چوشیں ماں گیشّ اتگیں جیڑھے نہ اِنت کہ ما ایشی ءِ سر ءَ بہ اڑ ایں۔ اگاں راجے یک زبانے ءَ ھبر کنت یا دہ زبان ءَ، دوئیں رنگاں پہ راج ءَ زبان اژدری اِنت۔
اے نوں نبشتہ کار ءُ وانندھانی زمہ واری اِنت کہ کستریں پدریچ ءَ وتی زبان ءِ ارزشت ءَ بہ گْوش اَنت گوں۔ آ وتی مھلوک ءَ سرپد بہ کن اَنت کہ شمئے راجدپتر چہ بامرداں زبھر نہ اِنت، شمئے دود ءُ ربیدگ چہ کسّ ءَ کمتر نہ اِنت کہ شما دگر ءِ گیگاناں بہ گر اِت، ءُ نہ کہ شمئے زبان نزور انت کہ شمارا دژمن ءِ زبان ءِ ھاجت بہ بیت۔ ھما زانتکار کہ وت ءَ راجدوست گْوش اَنت بلے وتی مھلوک ءِ سرپد کنگ ءِ ھاتر ءَ مدام دری زباناں نبیسّ اَنت، دری زباناں ھبر کن اَنت، آ اے بابت ءَ دو بر بہ جیڑ اَنت۔
یک سوبمندیں راجی جُنزے وتی مھلوک ءِ ھمے رنگیں جیڑھاں گیشّین ایت۔ چوشیں جُنز راج ءَ یک جاہ کنت، گوں زُبان ءَ مھر پرمائیت ءُ چہ گُلامی ءَ نپرت ءِ سکین ءَ دنت۔ بلے اِد ءَ نپرت تھنا ھورکیں زِدّے نہ اِنت، منزل ءِ نیمگ ءَ مھکمیں سکینے کہ راج ءَ جھد پرمائیت، آئی ءَ بلد کنت۔
راجی جُنز راج ءِ ھرچ تک ءُ پھنات ءِ مردم ءَ گوں وت ءَ ھوار کنت۔ بزگر، پوریاگر، کاروباری مردم، وکیل، نبشتہ کار، لبزانت درست ھمے راہ ءَ سپر کنان بنت۔ نودربر ھم چرے جھد ءَ سان زور اَنت ءُ ایشی ءَ متاسر کن اَنت۔ بلے وانندہ بوگ ءِ سوب ءَ راجی جنز ءِ تہ ءَ جاگہ جاگھے نودربرانی زمہ واری گیشتر بنت۔ مسال ء ھبر ءَ نودربر سیاست کُت کن اَنت، لٹریچر نبشتہ کُت کن اَنت، وتی زبان ءَ پٹ ءُ پول کت کن اَنت، چاگرد ءَ نوکیں باوست آؤرت کن اَنت۔ بلے اے بژن ءِ ھبرے کہ جنگ ءِ زمانگ ءَ مرچی مئے بازیں ورنایاں وتی دلگوش گیشتر گوں زاتی کاراں، گوں اسکالرشپاں، گوں روزگار، یا گوں وش وابی ءَ داتگ۔ اے مئے آزات ھیالی اِنت کہ مرچی یونیورسٹی ءِ تہ ءَ مئے جیڑہ چادر اِنت، جنک اِنت، ناچ ءُ سُھبت اِنت، پتّائی اِنت، بے سریں وش گپی اِنت، نشہ اِنت۔ مرچی مئے دپ ءِ ھبر ءُ مئے کردار ھم رنگ نہ اِنت۔ اے ھالتانی تہ ءَ کہ مارا پہ وتی راج ءُ زباناں کار کنگی اِنت، ما وت ءَ گْونڈ گْونڈیں مسلھانی تہ ءَ دزگٹ کتگ۔ اگاں ایر دستیں راجانی ورنا اے رنگ ءَ نابود ءُ وتسر بہ بنت گڑا آیانی باندات امروز ءِ مُجاں مئیم نہ بیت۔
بلوچ نودربراں مرچی اے ھبر جیڑگی اِنت کہ وتی راج ءُ زبان ءِ درگت ءَ آئی ءِ زمہ واری چی اَنت۔ آئی ءَ زانگی اِنت کہ آئی ءِ کار تھنا ھوٹلانی دپ ءَ پوتاری اِنت یا پہ وتی مھلوک ءَ دلجمیں جھد اِنت۔ اے ڈجیٹل زمانگ ءَ من ءُ تو باز کار کُت کن ایں۔ دُژمن مُدام ھمے لوٹ ایت کہ راج ءِ ورنا چہ وتی زمہ واریاں بیھال بہ بنت، راجدوستی، زُبان ءُ دود ءُ ربیدگاں لگتمال بہ کن اَنت ءُ مجگی گلام جوڑ بہ بیت بلے بلوچ ورنایاں پہ وتی باندات ءَ اے پندل بے سوب کنگی اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔