شھدگانی سر ءَ چیک پوسٹ – ٹی بی پی شونگال

شھدگانی سر ءَ چیک پوسٹ

ٹی بی پی شونگال

بلوچستان ءِ جیڑہ ءِ سر ءَ سروزیر سرفراز بگٹی ءِ سروکی ءَ یک نیادے ءَ پیسلہ کنگ بیتگ کہ بلوچ گھگیری جنگ ءِ دارگ ءِ ھاتر ءَ پھزداری گیش کنگ ءُ بلوچ جنگولانی ھلاپ ءَ سرجمی ءَ زور ءِ کارمرد کنگ بیت اِنت مزن شھدگانی سر ءَ پھریزی ءِ واستا لیویز، پولیس ءُ فرنٹیئر کور کہ ھما چیک پوسٹاں پاد کنگ بیتگ اَنت آ دوبر برجاہ کنگ بنت اِنت-

بلوچستان ءَ پاکستانی پوج ءِ سر ءَ ٹوھیں اُرشاں پد ریاستی ادارہ تاکت ءِ کارمرد کنگ ءُ شھدگانی سر ءَ چیک پوسٹانی گیش کنگ ءِ گپ ءَ کن اَنت بلے دو دھکاں سرجمیں بلوچستان ءِ شھدگانی سر ءَ پاکستانی پوج، فرنٹیئر کور ءُ کوسٹ گارڈ ءِ سدانی ھساب ءَ چیک پوسٹانی جاڑیگ بوگ ءَ ابید ھم بلوچ سلاہ بندیں گلانی اُرش برجاہ اَنت-

پاکستانی لشکر ءِ چیک پوسٹاں لس مردمانی کمشرپی ءُ اُرشاں پد سیاسی باسکانی لوگانی سر ءَ بیڑ بری ءُ زورانسری آوار جنیاں جیڑہ ھلاس نہ بنت اِنت – بلوچستان ءِ ٹرانسپورٹرز پیسر ءَ زھرشانی کنگ ءَ اَنت – کوسٹ گارڈ ءِ بدرویشی ءِ ھلاپ ءَ مکران ءُ کراچی ءِ کوچ یونین ءَ سروس ءِ ھلائینگ مھتل کتگ انت ءُ ترندیں ایس ءُ پیز ءِ ھلاپ ءَ بس ٹرانسپورٹرزاں شال تپتان دگ ءَ سروس مھتل کتگ – چیک پوسٹاں لس مردمانی کمشرپی ھلاس کنگ ءُ چوکیانی ھلاس کنگ ءَ جتا جتائیں وھداں زرمبشت بیتگ اَنت-

اے گامگیجاں جیڑہ ھلاس نہ بنت اِنت بلکیں گیش بنت اِنت – بلوچستان ءِ راستیں جیڑہ بلوچ راجی اگبال ءُ آجوئی اِنت ءُ بلوچ ءِ جیڑہ ءَ تچکیں رنگے ءَ گیشنگ ءَ ابید اے گامگیجاں بلوچستان ءَ ایمنی آرگ نہ بیت اِنت-