دی میجر شھید پیرک جان – مزدک بلوچ

دی میجر شھید پیرک جان

نبشتہ کار: مزدک بلوچ

دی بلوچستان پوسٹ

نورا پنام میجر پیرک 1992 ماں پروم ءَ واجہ شیردل ءِ ءُ بی بی مھناز ءِ لوگ ءَ وتی چماں پچ کنت۔ آ وتی بنداتی وانگ ءَ داں ھشت مکتب( کلاس ) ءَ وتی میتگ ءَ وَانگجاہ ءَ وانیت ءُ پہ دیمتر ءَ وانگ ءَ آئی ءِ کماش آئی ءَ پَنجگور ءَ دیم دنت چہ پَنجگور دہ تبکے دربرگ ءَ پَد پہ گِیشیں وانگ ءَ آ شال ءَ روت، ماں سائنس کالج شال ءَ وتی دیمتری وانگ بندات کنت، اے کساس 2007، بیت کہ اے وھداں بلوچ نودربر سیاست نوک وتی گاماں بیت نورا چہ شال ءَ نودربر سیاسی گَل ءِ چست ءُ ایراں باز سانمند بیت، ھمدا گوں بی ایس او (آزاد) ءَ ھمگرنچ بیت ءُ وتی سیاست ءَ بندات کنت وھد گْوزان کنت نورا شال ءَ وانگ ءَ سرجم کنت ءُ پہ گیشیں وانگ ءَ دیم پہ پنجاب ءِ مزن شھر لاھور ءَ روت، اود ءَ ایڈورڈ میڈیکل یونیورسٹی ءَ چم ءِ ڈاکٹری (Ophthalmology) وانگ بندات کنت۔

نورا وانگ ءَ ماں پنجاب ءَ نورا جان وہدے کہ چہ شال ءَ پہ لاھور ءَ درکَپ اِیت گڑا نمیرانیں کمبر چاکر اود ءَ پیسرا پہ آئی ءَ جاھے شوھاز کنت، کمبر جان لاھور ءَ سنگتے ءَ ھال ءُ اھوال کنت کہ سنگتے پیداک اِنت شوکیں سنگتے! بی ایس او آزاد ءِ کاراں ھوار ئے کن اِت، نورا جان لاھور ءَ سر بیت، پہ گل ءِ کاراں تَچ ءُ تاگ ءَ بندات کنت پنجاب ءِ ھر شھر ءُ وانگجاھاں کہ بلوچے وانگ ءَ بیت نورا گوں آھاں نند ءُ نیاد کنت، وانگ ءِ سکین ءَ دنت، بلوچستان ءِ ھَمُک جیڑہ آئی ءَ پنجاب ءِ دگانی سر ءَ آؤرتگ ءُ زھرشانی کُتگ، بلوچ ءِ ھر وڑیں چِست ءُ ایراں گون بوتگ مسنگ پرسنزانی جیڑہ ھر وھداں گوں مزنیں وکیلاں ڈِسکس ئے کرتگ آھانی کرّا نِشتگ، انچوشکہ، آسمہ جھانگیر بوتگ ڈاکٹر مبارک ءُ دگہ پاکستانی مزنیں زانتکار بوتگ اَنت نورا ھر جاہ ءَ بلوچ ءِ توار بوتگ، آئی ءِ کارانی برورد بوتگ کہ بی ایس او آزاد پنجاب ءِ وڑیں شھراں مھکم بوتگ وھدے کہ 2008 ءَ بی ایس او آزاد ءِ کونسل سیشن بیت نورا گوں سنگتاں کیت شال ءَ کونسل سیشن رند کہ لاھور ءَ روت نورا پنجاب ھنکین ءِ کارگشاد گچین کنگ بیت نورا گَل ءَ سرجمیں پنجاب مھکم کنت ھرچ بلوچے کہ پنجاب ءَ وانگ ءَ بیت آرا الم گوں کاراں ھوار جنزے بھر اِش جوڑ کنت، دیمتر ءَ نورا پنجاب ھنکین ءِ کارمستر گِچین کنگ بیت، ھمے وھد ءَ آ راجی کاراں دَز گٹ اِنت ھال کئیت کہ چئیرمین زاکر جان پاکستانی چیریں اِدراھاں بیگواہ کُرتگ ، گڑا نورا ایمنی نہ نند ایت، روڈ ءُ شھ دگاں بند کنت زھرشانی کنت ریلی کش ایت داں بھوک ھڑتال ءَ نند اَنت نورا پاکستان ءِ دلبند ءَ نشتگ ءُ پہ بلوچ ءَ توار چِست کنگ ءَ اِنت پاکستانی اجنسیاں وش نہ بیت وھدے کہ شپ ایر دنت گڑا نورا ءِ ھاسٹل ءَ دور کننت نورا ءَ گوں وت بر اَنت سئے چار روچ ءِ آزار پد نورا ھمئے شرت ءَ یل دیگ بیت کہ ، ترا باندا یک پریس کانفرسے کنگی اِنت ءُ اود ءَ اے ھبر ایر کنگی اِنت کہ زاکر مجید پاکستان ءِ اجنسیاں بیگواہ نہ کرتگ، آ کوہ ءَ جنگ کنگ ءَ اِنت نورا آ ساھت ءَ ھچ گوشت نہ کنت وھدے شپ بیت نور یل دیگ بیت کہ سھب ءَ بیا پرس کانفرسے بہ کن گڑا نورا ھمئے شپ ءَ گوں دگہ سنگتے ءَ بس ءَ ٹیکٹ کنت ءُ دیم پہ کراچی در کپ اَنت سرجمیں راہ ءَ بس بدل کناں بنت داں کراچی سر بنت پد ءَ نورا تربَت ءَ روت ھمود ءَ پریس کانفرسے کنت ءُ وتی بیگواہ کنگ ءِ کسھاں کار ایت ءُ ھمئے گوش ایت کہ من ءَ ھمئے واستا یل کنگ بوتگ کہ تو پریس کانفرس ءَ بہ گوش کہ زاکر کوہ جنگ کنگ ءَ اِنت پاکستانی چیریں آزار جاھاں نہ اِنت۔

نورا ءُ بلوچستان: نورا وھدے وتی لوگ ءَ کئیت تاں کماشے گوش ایت کہ تو باز ونتگ، وتی وانگ ءَ سرجم کن بلے نورا نو چہ اے مُلک ءِ وانگ ءَ دل ساپ اَت کہ اِد ءَ وان ئے شر نہ وان ئے شر مانا یک اِنت، گڑا کماشے گُش ایت ترا ڈَنّ راہ دئے آں بلے ھمئے زوتاں پاکستانی اجنسیاں عابد ءُ مھراب نمیران کرتگ اِت انت نورا ھمئے پسہ ءَ دنت کہ منی مردمانی ھون انگت ھُشک نہ اَنت من پہ کجام لج ءَ ڈن ءُ دران آں من ھچ جاگہ نہ رو آں، نورا وتی راج ءِ بزگی ءُ لاچاریاں گند ایت ءُ سِنچ ءُ سما ءِ گڑمڈی سیمسراں سربیت; گوگی وانتیانگو گُش اِیت “Armed struggle is the peak point of political Maturity” بلوچستان ءِ نورا مینگل بہ بیت یا، میجر نورا کہ آئی ءِ سیاسی سرپدی اَنچو مھکم بوتگ اَت کہ آئی ءِ تنھا یکیں کِشک پہ کبزہ گِیر ءِ کَشّگ ءَ دَرچِت ۔

نورا ءُ بلوچستان آجوئی سنگر (BLF): نورا چہ سیاسی جھد ءَ بگر دانکہ بلوچ راجی آجوئی گلانی ھوار بوئگ ءَ یکشل ءُ گوں مھکمی ءَ جھد کنگ اَت کہ وتی ایردستیں راج ءَ وشھالیں بانداتے نیمگ ءَ راھادگ بہ کنت، 2010، ءَ نورا بلوچ سلاہ بندیں گَل بلوچ آجوئی سنگر ءَ گوں یک مھکمیں پِگرے ءَ ھوار بیت، ءُ دژمن ءِ واستا یک بیھارے بیت ءُ ھر اُرش دژمن ءَ نورا مینگل ترانگاں گیج ایت، نورا بلوچستان ءِ بازیں دمگاں پہ دژمن ءَ یک ترُسے بیت ءُ دیم ءَ کیت ۔ اے وھداں بازیں ھند ءُ دمگاں نورا جتائیں اُگداھانی سر ءَ بیت ءُ جتا جتائیں دمگانی کماندار بیت یک رندے یکجاھے سنگر کن اَنت ءُ دژمن ءِ لشکر ءَ شریں دِرڈّ گِر اَنت ءُ در کپنت داں دژمن راہ ءِ نیمگ دوچار کپیت، گڑا گیگ نہ گند اَنت دژمن ءِ انگیر ءَ کاینت نورا دراھیں سنگتاں کَشّ اِیت بلئے جند ئے پش کپیت، داں گُڑی ساہ ءَ دژمن ءَ جنگ دنت ءُ وت چہ دژمن ءَ زد ءَ کَش اِیت۔ نورا کہ ھرچ وھداں گوں دژمن ءَ دو پہ دو بوتگ پہ آسودگی ءَ نہ اِشتگ ئے۔دوھزار ءُ سینزدہ ءَ نورا پاد ءَ تیر وارت ءُ ٹپی بیت انگت یک ساھتے ءَ واستا چہ راجی پِگر نہ سد ایت پاد ءِ درماں کنگ ءَ درمان جاہ ءَ نہ روت ھمودا اوتاک ءَ درمان ئے کنت داں گھتر بیت سنگت گُش اَنت کہ شھر ءَ برو پاد ءَ درمان کن بلے آ یک ساھتےِ اوں وت ءَ چہ جھد گستا کنگ نہ لوٹ ایت ۔ نورا ھما مزن پگریں جھد کاراں ھوار بیت اِنت۔ 2017 ءَ بلوچ راجی آجوئی سنگر (BRAS) ءِ بُن ھشت ءَ ایر کنگ ءَ مزنیں کِردے پیلو کنت، شَپ ءُ روچ ھمئے تچ ءُ تاگ ءَ بیت کہ بلوچ راجی آجوئی گل مھکم کنگ بہ بنت۔ نورا دی میجر بلوچ ءِ ھما جھد کارانی لڑ ءَ ھوار اِنت کہ آھاں وتی زندے ھر دمان پہ راجی جیڑاھانی توجیل سازی داتگ، آ ھرچ کجام پڑ بہ بیت، سیاسی یا گھگیری بہ بیت آ ھر سھت ءُ دماناں پہ بلوچ ءِ باندات ءَ جیڑگ ءَ بوتگ بلوچ ءِ وت واجھی ءِ گرگے چِست ءُ ایراں گِر ءُ چیل بوتگ داں گڈی وھد ءَ آ گوں سنگتاں اِستان ءِ لشکر ءِ انگیران بیت انگت آئی ءِ زوان ءَ بلوچ ءُ بلوچستان ءِ باندات ءِ ھبر بیت، کہ آ وتی گڈی کلوہ ءَ پہ راج ءُ وتی کھول ءَ سر کنت ءُ ھمئے گُش ایت کہ پہ منی مرگ ءَ کَس موتک میار ایت بلکیں شادان بہ بَیت کہ مرچی یک بلوچے ءَ وتی راجی ڈُبّہ سرجم کتگ۔ ءُ آئی ءَ ھرچ وھداں راجی آجوئی گلانی مھکم کنگ ءِ ھبر کرتگ بلئے گڈی کلوہ ءَ گیش زور دنت کہ فرد ءَ چہ گِیش راجی آجوئی گل مھکم کنگ بہ بنت گڑا فرد وت مھکم بنت۔ نورا 21 پروری ءَ 2020 ماں پروم ءَ یار مھمد گوکی ءِ میتگ ءَ گوں چار سنگت ءَ، عبدالمالک ءِ ھاجی گلام ھسین، گلاب ءِ ھاجی گلام ھسین کہ چہ یکیں کھول ءَ اَنت ءُ مومن ءِ مھمد عظیم کہ بلیدہ میناز ءِ جھمنندے بیت، گوں پاکستانی لشکر ءَ داں گڈی تیر ءَ جنگ دنت ءُ دژمن ءَ ھمئے کلوہ ءَ سر کنت کہ نورا ءَ وتی سرگوں سنگتاں دات بلئے توپک ئے دور نہ دات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔