کمانچر تئی رپتگیں ارواہ ءِ نام ءَ
شائر: زِر ملار
دی بلوچستان پوسٹ
زندگی کاگدے
ھَور بیت اِنت دِریت
تو بہ زان ئے کہ تی،
دیدگانی تہ ءَ
گلزمیں گیمُریت
پُل چہ دست ءَ رَواں
رنگ بے رنگ باں
مُرگ سوتاں گوپاں
وھد پَنداں گوزیت
تو کہ گِستا بہ بئے
پَش کپیت ایوکی
ایوکی چول جنت
چم ءُ دل دمبراں
پاد گرنچاں بوجاں وتی
بس سپر آگہیں
زندگی سوت جنت
پش کپنت واھگانی
پاد شپادیں نپس
تو کہ جنز ئے چِدا
تُنیگ بیت کوھسارے
گوں آپاں وتی
تو کہ جنز ئے چِدا
او منی ھم نوا او
منی ھمسپر
نی کہ شال ءِ بدن
برپ بوشیت اگاں
گٹ کنت گِیرانی
کَورے من ءَ