لُمہ کریمہ
نبشتہ کار: شانتل بلوچ
دی بلوچستان پوسٹ
لبز لُمہ وتی تہ ءَ وت یک پگر ءُ اھساسے ءِ نام اِنت ءُ اے لبز ءِ اشکنگ ءَ گوں مھر ءُ دوستی، کربانی ءِ گرنچ چو سبزیں آزمان ءَ انسان ءِ زند ءَ سھرا کنت ۔ ءُ مارا چہ بانُک ءِ کرد ءَ آشنا کنت ءُ اے سکین ءَ دنت کہ لُمہ پہ بلوچ راج ءَ یک انچیں ماتے ءِ وڑ ءَ بوتگ کہ آئی ءَ وتی شپ ءُ روچ پہ وتی راج ءِ باندات ءَکربان کرتگ ءُ بلے آئی ءِ زبان ءَ اُفے ءِ اوں در نہ یتکگ-
وھدے کہ لبز لُمہ مئے گوشاں کپ ایت گڑا بس یک مردمے مئے دیم ءَ کیت ءُ آ لُمہ کریمہ اِنت چیا کہ لُمہ مھر ، دوستی ءُ کربانی ءِ نام اِنت۔لُمہ کریمہ یک اھد سازیں شکسیتے بوتگ، آ یکیں وھد ءَ وتواجھی جنز ءِ سکی ءُ سوری ءُ لوٹانی بنیاد ءَ سکیں ترندیں ءُ پہ وتی سنگت ءُ بلوچاں چو ماتے ءِ دروشم ءَ مھرناکیں مردمے بوتگ۔ چُشکہ آ وت جاگھے ءَ گُش ایت” زورگیری یک تماہے، ھرسے بلے گھگیری مھر ءِ بنیات ءَ بیت۔ پہ وتی زمین ءَ مھر، پہ وتی ھستانکی ءَ مھر، پہ وتی پجار ءَ مھر ءُ مھر گوں وتی نزورتریں جاور ءَ چہ تماہ ءَ ھزار براں تاکتور ءُ مستر اِنت۔”
لُمہ کریمہ 1986 ءَ دبئی ءَ ودی بوتگ ءُ وتی کسانی ءِ روچ دبئی ءَ گوازینتگ اَنت۔ در کسانی ءَ پد آ وتی جند ءِ زمین تمپ ءَ کیت۔ بانُک ءَ وتی بُنکی سیاسی شَئور چہ وتی گس ءَ رس اتگ۔ آ یک انچیں چاگردے ءَ مزن بوتگ کہ اود ءَ بلوچ ءُ بلوچستان ءِ جیڑھانی سر ءَ مدام باوست ءُ گپ بوتگ۔کسانی ءَ چہ استان ءِ زوراکی ءُ وتی زمین ءُ مھلوک ءِ ڈالچاری آئی ءِ سیاسی ردوم ءَ کن اَنت۔ھمے جاور ھال آئی ءَ ھاموشی ءَ نندگ ءَ نئیل انت، ءُ 2006 ءَ آ بی ایس او ءِ باسک جوڑ بیت۔ ءُ پد ءَ ھمے بانک اَت کہ مدام تگ ءُ تاچ ءَ اَت، وانگ ءَ ات، وتی مھلوک ءَ گوں تران ءَ اَت۔ اے بانک ءِ مھکمیں شکستے ءِ برورد ات،کہ آئی ءَ ھرچ وڑیں سکی ءُ سوری اوپار کت، بلے مدامی جنزان اَت، اے شیر زال ءَ اے ٹوھیں سپر ءِ نیام ءَ بِھ وتی زبان ءَ چہ اُفے ھم در نہ کت۔
بانُک یک مھکمیں سیاسی جھدکارے ات آئی ءَ ھر وڑیں ناوشیں ءُ ناسازیں جاورالاں جھدکُت ۔ بلے آ کدی ھم دلپروش نہ بوت بلکیں گرانیں ساھتاں وتی کوم ءُ مردمانی مدام ھمت ءُ گموار جوڑ بُوت۔ بانک یک مھروانیں راجدوستے ات۔ آ نہ تھنا یک شیرزالیں سیاسی جھدکار ے ات بلکیں باکمالیں انسانے ات۔ آئی ءَ مدام وت ءَ چہ پیسر وتی زمین ءُ راج ءِ بابت ءَ جیڑ ات ۔آ اے ٹوک ءَ سرپد ات کہ ما یک گلامیں راجے ءَ گوں سیادی داریں۔گلامی ءِ ھلاس کنگ ءَ مارا وتی زند ءِ ھر واھشت ءُ وشی پہ زمین ءَ ندر کنگی اِنت۔ لُمہ یک جوانیں ترانکارے اَت آئی ءَ مدام وتی تراناں چہ بلوچ راج ءَ را یکجاہ ءُ یکمشت بوگ ءِ سکین ءُ وتی راجی آجوئی ءِ ھاترا جھد کنگ ءِ دلبڈی دات۔ لُمہ ءِ شائری ءُ نبشتانکانی سرھال مدام بلوچ ءُ بلوچستان ءِ جیڑہ بوتگ اَنت۔
نمیرانیں لُمہ کریمہ بلوچ ناں تھنا بلوچ گھگیری ءِ چیدگ اَت بلکیں آ اولی زالبول اَت کہ آئی ءَ ایردست ءِ داتگیں ھر ھمک ھیال کہ بلوچ زالبول تھنا لوگ ءَ بہ بیت یا دگہ ھچ کار مہ کنت اے درستیں پکر بانُک ءَ پروش دات اَنت ءُ بلوچ زالبولاں ھمے ٹوک سرپد کناینت کہ آ وتی راج ءُ وتی کوم ءِ جھد ءَ وتی برات ءُ وتی سنگتانی ھمکوپگ اَنت ءُ بلوچ ءِ وتواجھی جھد ءِ دیمروئی ءَ پہ یک بلائیں کردے دار اَنت۔ لُمہ وتی یک نبشتانکےءَ گُش ایت “بلوچ راجی جنز ءَ بلوچ زالبولانی بھر زورگ یک نیمگے پہ جنز ءَ بے کساس پائدگ اِنت، گڑا دومی نیمگ ءَ پہ زورگیریں تاکتاں سر ءِ درد جوڑ اِنت۔ ” بانُک ءَ بلوچستان ءِ مردماں اے گپ سرپد کُت کہ زالبول ھم ھمے چاگرد ءِ بھر انت ۔زالبول جتا کنگ نہ بنت اگاں زالبول کومی جنگ ءَ ھوار مہ بنت گڑا اے جنگ ھچبر باج برگ نہ بیت۔ چیا کہ وتواجھی ءِ جنگ ناں تھنا کوزہ گیر ءَ وتی زمین ءَ چہ گلینگ ءِ کوشستے بلکیں یکیں وھد ءَ وتی چاگرد ءِ پلگارگ ءُ کوزہ گیر ءِ داتگیں ساناں چہ کشگ اِنت۔ بانُک ءِ مزنیں سوبمندی ھمے بُوتگ کہ وھدے بانُک نمیران کنگ بُوت ءُ آئی ءِ جون بلوچستان ءَ آرگ بوگ ءَ اَت گڑا اے ناپاکیں ریاست ءَ ھزار اڑاند ودی کُت ، بلے بلوچستان ءِ مردماں ریاست ءِ دراھیں اڑاند پروش دات انت ءُ گوں ھمت ءُ جوزگ ءَ دیم ءَ اوشتات انت۔ تمپ ءِ دراھیں دَگ بند کنگ بوت انت بلے بلوچ مردین ءُ زالبول چہ بلوچستان ءِ کنڈ کنڈ ءَ چہ پیدل اتک انت ءُ بانُک ءِ جنازہ ءَ ھوار بُوت اَنت ءُ بانُک ءِ میت ءَ کوپگ دات، بلوچ راج ءِ لمہ ماں تمپ ءِ مسکیں ڈگار ءِ باھوٹ کت۔
بانک بوت کنت کہ مروشی مئے پجی ءَ ساڑی نہ اِنت، بلے آئی ءِ سوچ ءُ پگر مدام مئے رھشونی ءَ کنان اِنت مروشی ھمک بلوچ زالبول اگاں پہ وتی زند ءَ راہ ءِ گیشینگ لوٹ ایت گڑا آ لُمہ کریمہ ءِ زند ءَ وتی دیم ءَ ایر بہ کنت ءُ پہ وتی راھے بہ گیشین ایت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔